Kungaba kuhle uma bengekho abakhwabanise imali yezisebenzi
Kuyinto ebuhlungu ukubona aboHlanga abayizisebenzi beba ngabagilwa babaqashi abangathembekile. Noma sekukhona abazama ukunika usizo izisebenzi kutholakale ukuthi izisebenzi yizo ezivikela abaqashi abangathembekile kubo ngoba zincenge ukuqhubeka zisebenze. Kuye kuthi uma sekuxatshenwe phakathi komqashi noyisisebenzi kube yima kuvela amaqiniso abefihliwe.
Ngiyaye ngikhumbule isikhathi lapho sasivakashela izisebenzi, sizibuze ukuthi ziyazithola yini izimfanelo zazo kumqashi. Lolu hlelo lwaluhlose ukuqinisekisa ukuthi izisebenzi ziyawathola wonke amalungelo azo emsebenzini futhi akukho zikhalo ezinazo.
Engakufunda wukuthi kunezisebenzi ezijabulisa abaqashi ngokuqamba amanga zithi zizithola zonke izimfanelo kodwa eqinisweni zibe zingazitholi. Kwakungethusa ukuthi kungakapholi maseko usibone isisebenzi sesitheleka emahhovisi sethula izikhalo, sesixoshiwe sanganikezwa izimfanelo zaso obekumele sizithole ngokwesikhathi esisisebenzile kulowo mqashi. Abantu abavamise ukuba yizisulu ngaboHlanga, okuyinto eyayethusa ngoba abanye babegcina belahlekelwe ngokukhulu kungaseyuphinda kubuye. Angizukugxila kulokhu namuhla kodwa kuhle sike sibuke okwenzeka kulezi zinsuku.
Kuyathokozisa ukuzwa ukuthi kuzophenywa ngemali eseyikhokhelwe izinkampani zixhaswa uHulumeni ngokukhahlanyezwa wukhuvethe.
Inhloso enkulu yokukhishwa kwale mali kwakuwukuba kwelekelelwe izinkampani ezinezisebenzi ezithikamezekile ngesikhathi sokhuvethe nemvalelwakhaya, kwenzelwa ukuba zikhokhele izisebenzi kungabe sekunqamuka amaholo ngoba kuvalwe ukusebenza. Igama elithi Unemployment Insurance Fund (UIF) lichaza inhlangano kaHulumeni ekhipha izimali zokwelekelela kulabo abaphelelwe wumsebenzi. Ngokujwayelekile lena yimali ebanjwa ngumqashi emalini ayikhokhela isisebenzi, naye aphonse ingxenye, le mali bese igcinwa yinhlangano i-UIF.
Kodwa kulesi sikhathi uHulumeni wayezokhipha imali yokwelekelela izinkampani zingadilizi izisebenzi ngenkathi zisamile ukusebenza, okuyinto eyenzelwe ukubhekana nesikhathi sokhuvethe. Nembala zazifaka izicelo izinkampani zaphuma izimali ngokubika kwabe-UIF.
Ngenyanga kaMandulo abe-UIF babike ukuthi sebekhokhe imali eyizigidigidi ezingama-45. Bayigagula bathi ngamarandi ayizi-45 244 060 501.31 akhokhelwe abaqashi abayizi-902 775. Ngokuchaza koMphathi osabambile ku-UIF, uMarsha Bronkhorst, bekulindeleke ukuba ngenyanga kaMandulo kuhlolwe imininingwane ethile ethunyelwe yizinkampani ezifake izicelo kule mali, okubalwa kuyo nemininingwane yebhange imali ezofakwa kulo.
Ngenkathi behlola lezi zicelo asebezitholile sebeqalile ukuba kunezinsolo zokuthi kukhona abafake izicelo ngenhloso yokuthola imali ngendlela engaqondile. Izicelo okunezinsolo ngazo zibekwe eceleni zafakwa ngaphansi kohlelo lwabaphenyi ukuze kuqinisekiswe ukuthi ziyizicelo ezifanelekile.
Isikhathi sokufaka izicelo selulwa nguNgqongqoshe uThulasi Nxesi sabekwa ngomhlaka zili-15 kuMandulo. Kuze kube ngaleso sikhathi bekusenezisebenzi ebezingakabuyiselwa emsebenzini ngenxa yokuqhubeka kokusebenza komthetho, iDisaster Management Act, kanti kukhona nalabo okube nezinguquko ekusebenzeni kwabo baphoqeka ukuqala izindlela ezintsha zokusebenza, njengokusebenzela emakhaya nokunye. Bonke abazithole bekulesi simo bakhuthazwa ukuba bafake izicelo zabo ngaphambi kwawo umhla zili-15 kuMandulo.
Kukho konke lokhu okuyimizamo eyenziwe uHulumeni kungenzeka kube nabathile ababone ithuba lokukhwabanisa imali bazitholele igwaxazi, elingezukufinyelela ezisebenzini.
Kungenzeka futhi kube nezinkampani ezizifakile izicelo kodwa zangaziswa izisebenzi ukuthi kunezicelo ezifakwe emagameni azo, okuzokuthi noma zikhokhelwa izinkampani, abaqashi bavele bawuhlabe inhlali bazidlele imali. Kungenzeka
futhi kube nezisebenzi esezidiliziwe ngaphandle kokulandela uhlelo obelubekwe uHulumeni lokwelekelela abaqashi. Lokhu kungenziwa nawukuthi abanikazi bezinkampani kunemigomo kaHulumeni ebhekwe kubaqashi, abangayilandeli, okwenza bazibone bengenandlela yokufaka izicelo kulolu hlelo obeluvulwe uHulumeni. Kuleso simo izisebenzi zigcina ziyizisulu zilahlekelwa yimisebenzi, kodwa futhi zingenakuhlomula njengabantu abaphelelwe yimisebenzi. Ngenyanga kaMfumfu abe-UIF bese bekhokhe imali eyizi-R51 045 255 369.21 okuthinta izinkampani eziyizi-1 000 824. Noma belijabulela ibanga asebelihambele ukubhekana nesimo sezinkampani nezisebenzi, kusenezisebenzi eziyizi-462 863 okusalindeleke abaqashi ukuba bacacise ngezinto ezithile ezidingekayo ukuze zikhokhelwe.
Kamuva nje ukugcizelele uNks uBronkhorst ukuthi sebeqala uphenyo ezinkampanini ezathola uxhaso ngokohlelo lwesikhashana olubizwa ngeTemporary Employer-Employee Relief Scheme.
Lolu phenyo luhlose ukubhadama labo okungenzeka ukuba bathole uxhaso bengayilandelanga imigomo, noma bengafanelekile ukuluthola. Lokhu kungathathwa njengokukhwabanisa bese bethathelwa izinyathelo labo abathintekayo ekwephuleni imigomo.
Abaqashi bazovakashelwa ngabacwaningi abagunyazwe yi-UIF beya kuleyo naleyo nkampani ethole uxhaso. Abaqashi kulindeleke ukuba bagcine le mininingwane isobala ukuze bayinike abacwaningi uma sebefikile:
• Umqulu oqukethe imininingwane yokufaka isicelo;
• Konke okuphathelene nebhange okungene kulo imali yoxhaso;
• Ifayela laleso naleso sisebenzi;
• Nombiko wokuholelwa kwezisebenzi kusukela enyangeni kaMasingana kuya enyangeni kaNtulikazi kulo nyaka ophezulu.
Sinethemba ukuthi ukuphenya okunje kungasiza ezintweni eziningi, kodwa kungakuhle uphenyo lwenziwe nakuzo izisebenzi zakwa-UIF ngoba ike ibe khona imibiko lapho kutholakala ukuthi kukhokhelwa izisebenzi nezinkampani ezingekho, kanti umkhuba usekhaya.