Ubani umzali, yini ubuzali? Umthetho uyacubungula efeni lengane
Esikhathini samanje izingane eziningi zikhuliswa ogogo ngemali yesibonelelo sikaHulumeni lokhu okudalwa yizimo ezahlukene ezenzeka empilweni. Kwesinye isikhathi kungaba ukuthi abazali bengane bobabili abasekho emhlabeni okanye omunye wabo akamulekeleli omunye ekukhulisweni kwayo.
Yingakho uMehluleli waseNkantolo Enkulu eGauteng, uJody Kollapen, esinqumweni asikhiphe ngoLwezi nonyaka ekubalulile ukuthi ogogo nomkhulu, ikakhulukazi ogogo, kusukela kudala babambe iqhaza elikhulu empilweni yezigidi zabantu.
UMehluleli uKollapen ubekhipha isinqumo ecaleni lombango wefa lezigidi ezili-R15 elishiywe umfanyana osashona obuphakathi kukaninakhulu wayo noyise omzalayo (ingane). Umbango, waleli lifa umninilo alishiye engayibhalanga incwadi yokulaba, ubumayelana nokuthi ngubani ofanele ukuthola le mali le ngane eyayinikwa uMnyango Wezempilo ukuthi ibhekelelwe ngomso njengoba kwaba nobudedengu izalwa okwaholela ekutheni ikhubazeke.
INkantolo yaqoka ozokwaba leli lifa emveni kwenyanga ingane ishonile ngoMbasa wezi-2018.
Uyise, unina nogogo bengane bafaka isicelo sokuba bathole leli lifa uMehluleli uKollapen athi sivusa inkulumo ebalulekile encazelweni ngokuqondwa kodaba lokukhulisa ingane nokuba umzali.
Kuleli cala uMehluleli uKollapen ugxile ekuhumushweni kwegama “umzali” emthethweni i-Intestate Succession Act (ISA).
“Ngabe ngokwenhloso yeISA incazelo yomzali kubhekwa ukuzalana noma kufanele kuqalwe kubhekwe ukuthi ukukhulisa ingane, ukuba ngumzali nobuzali kusho ukuthini emthethweni wethu, kubhekwe noMthethosisekelo okuyiwo omkhulu ezinhlakeni zomthetho wethu?” kubuza uMehluleli.
Ulwazi obeluphambi kwenkantolo ngoluthi abazali bale ngane kabazange baganane futhi abahlalanga ndawonye ngaphambi nangemuva kokuzalwa kwayo. Uyise ubengekho izalwa futhi akakaze abambe iqhaza njengomzali noma afake isandla, noma ingayiphi indlela, ekukhulisweni kwayo. Wagcina ukuyibona inezinyanga eziyisi-6 ubudala. Ingane ibihlala nonina nogogo wayo.
Unina wahlaselwa yingcindezi okwenza ukuthi angakwazi ukuyinakekela kahle, kwezinye izikhathi ubeke anyamalele izinsuku engaziwa. Wayengasebenzi ethembele kugogo wengane ngakwezezimali.
Ebona lesi simo ugogo wangenelela, wayeka umsebenzi ayewenza wokucwala izinwele wanakekela ingane ngokugcwele.
Ulwazi obeluphambi kweNkantolo luqhuba luthi, emva kwesikhashana ingane ishonile impi yomthetho yaphothulwa eNkantolo Enkulu eGauteng lapho unina wengane nogogo wayo baninkwa umthwalo namalungelo phezu kwayo kanti amalungelo kayise anqanyulwa.
Kuleso sicelo ugogo wageqa amagula eveza isimo sengane, echaza ukuthi yayingakwazi ukuhlala, ingakwazi ukuzidlela, ingaboni kahle emehlweni futhi idinga ukunakekelwa njalo, uthando nokunakwa.
Emva kwezinsku ezimbili ingane ishonile udaba lwase luya kuMehluleli uKollapen.
Uyise wengane yena wayethi udaba lwefa lomuntu oshone engayenzanga incwadi yokulaba “alucacile ekubalulekeni kwezindlalifa” futhi lubheke udaba lokuzalana ngokwegazi.
Kodwa uMehluleli uthe nakuba umthetho ukhuluma ngabazali ngomqondo osabalele, uvulelekile ukuba uhunyushwe.
Uthe kukancane ukuthi obaba bathole amalungelo okukhulisa izingane kanjalo nokubamba iqhaza ekukhulisweni kwengane kodwa kuloku ubaba uqome ukungazihlanganisa nengane ngenxa yokukhuubazeka kwayo.
“Ngaphandle kokufisa ukuthi ngimehlulele ngokuziphatha kwakhe, kodwa kuyaphambana nokufunwa ukuzuzwa uMthethosisekelo noMthetho Wezingane kokuthi izingane, ikakhulu ezikhubazekile, kufanele ziphathwe kanjani emphakathini wethu,” kusho uMehluleli.
Uthe ukuhumusha uMthetho ukuthi ubheke umzali njengalowo ingane eyavundla esiswini sakhe kuphela akubekezeleleki, ngeke kuwenze umqondo, ngeke kuvumelane nokuqonda kokuthi yini umzali futhi kuzoholela emiphumeleni engaphusile.
UMehluleli uKollapen uthe ngeke awuziba umbiko Wommeli Womndeni awenza ngaphambi kokuba ingane ishone owaveza ukuthi unina wayehlose ukwenza okuhle yingakho anikwa amalungelo obuzali nomsebenzi wokubheka ingane okuphelele.
Uthe ugogo kwakumfanele ukuba abizwe ngomzali ngokwe “qiniso, okwempela nangokomthetho”.
Uthe emandulo ogogo nomkhulu, ikakhulukazi ogogo, babamba iqhaza elikhulu empilweni yezigidi zabantu emphakathini, nakuba lokho babekwenziswa uthando olujulile lwabazukulu babo nokubanakekela, kodwa kwakheka ngenxa yomonakalo wepolitiki, ezomnotho nomphakathi okwalethwa ubandlululo empilweni yemindeni yaboHlanga.
UMehluleli uKollapen uthe ukuziphatha kukababa wengane kwehluke kakhulu kokukagogo wayo okuthe kusukela ikhishiwe esibhedlela emva kokuzalwa kuze kube iyadlula emhlabeni, uyondle ngothando, wayeseka, wayinakekela futhi wadela okuningi, akazicabangelanga yena ngokuthi anakekele zoke izidingo zengane ukulwela isithunzi sayo namalungelo.
Ube eseyalela ukuthi unina nogogo bahlukanise ifa ngokulingana.
Olunye ulwazi iGroundup