AmaNgisi akha izindawo zamaZulu endaweni kaZulu
Babevunyelwe ukuhlala ngoba babekhonzile ngoba neNkosi yayiliphathele abantu bayo. Yingakho uMpande wayengeke akwazi ukupha into ekwakungesiyo eyakhe.
Abantu bakhononda kodwa, hhayi obala ngoba babesovalweni besola ukuthi uMpande wayengahle abasasazele ngabamhlophe. Nakhona lapho njengoba uDingane wayesesiqedile isizwe, ukufuduka kwabantu ngenxa yeqhina likaMbethe baye eSibululungu nokungahleleki kahle hle kwamabutho kwakwenza kube nzima ukuyiviva ngesikhashana nje. Bamswela uMkabayi.
Kwathi kulo mhlaba amaNgisi ayengakwazi ukuhlala kuwo ngoba inani lawo lalilincane, bawubiza ngezwe lobukhosi baseNgilande (Crown Land).
Isizathu sokwenza lokhu, ukuthi amaZulu angakwazi ukuyohlala kuwo. Awagcinanga lapho, aqala uhlelo olwenza amaZulu, ayewaxoshwe ezweni loyisemkhulu, izigqila.
Lolu hlelo lwabizwa ngokuthi, “isibhalo” babeluchaza njengendella yokukhokha intela yombuso wamaNgisi. Bonke abesilisa ababengaphezu kweminyaka eyayishumi baphoqwa ukusuka emakhaya abo, bashiye imindeni yabo bese beyoqoqana ezinkambini zaseKoloni yaseNatali.
Lapho babesetshenziselwa ukugawula amahlathi, betshala umoba, bakha umjantshi nemigqwaqo ngaphandle kokukhokhelwa. AmaNgisi abeka isizathu sokuba namabutho ayengakhokhelwa ukusebenza emasimini aseBukhosini.
Aqhubeka ashaya umthetho wokuthi wonke amaZulu ayehlala eningizimu noThukela kwakufanele kulotsholwe ngezinkomo ezazingabi ngaphansi kwezaziyi-15 ukwenzela ukuba imindeni ikwazi ukuba nokudla ekhaya. Ngaphambi kwalo msangano waleli nani lamabheka elabekwa ngamaNgisi, kwakulotsholwa ngobikibiki, ubhaqa, imvulamlomo, ingquthu, inhlabisamthimba, ishoba nezinye ezazifikelela enanini elaliyishumi nanye lamabheka uma ziphelele.
AmaNgisi asevula amamishini nezikole kulezo zindawo ababethi ngezabo njengakwaDukuza, ePietermaritzburg, eDriefontein naseDindela. Kodwa kwakuvunyelwe labo ababengamakholwa kuphela ukufunda kulezi zikole. Kulapho amaNgisi athola abantu ababalekelela ngempi enkulu yaseSandlwana.
Abantu badinwa, kwase kuyabonakala ukuthi amaZulu ayezimisele ukuvukela umbuso wamaNgisi, yingakho uNdunankulu wamaNgisi uHarry Smith wasungula ikhomishana yemingcele eningizimu noThukela (Land Boundary Commisssion South of uThukela River) ngowe-1846.
Le khomishini yaphetha ngokuthi wonke amaZulu ayizifiki eningizimu yoThukela. Yase ihlongoza ukuthi kube nezindawana zamaZulu iLizevu (amaNative Reserve) ezazizophathwa ngaMakhosi, kulawule umthetho wamaZulu kuphela.
Bese kuthi wonke omunye umhlaba owawusasele wawungathathwa nanoma yimuphi umlungu ngaphandle kowukhokhela. Yingakho amaZulu ayibiza ngekhomishini mbumbulu, akubona kungeminye yemizamo yokudla umhlaba kaZulu.
Zonke izinhlaka ezazilawula imithetho yamaZulu yayingeke iguqulwe kule Lizevu yansondo. Kwathiwa aMakhosi ayezoqula wonke amacala emaLizevu kodwa izinqumo zawo zazizonikezelwa izimantshi ezimphlophe.