Imfundiso iyona mfundo umuntu okufanele ayiphokophelele
Imfundiso yona yomuntu nomuntu, namava akhe ngokuzuza izigaba ngezigaba zemfundo (izitifiketi, amaqhuzu neminyezane).
Imfundiso, iyimfundiso nje. Inhlonipho iyona nje. Kayinaso isitifiketi, idiploma, iqhuzu, kepha iyizimiso phambili kwezulu nomhlaba. Imfundiso iyizimiso zabantu abadala. Imfundiso ayithekeli.
Imfundiso iyinkomba yinkomba yomuntu wesifazane ephelele neyomuntu wesilisa ephelele. Kuyenzeka umuntu abeneziqu eziphezulu zemfundo kepha angabi nayo imfundiso.
Kungenzeka umuntu abe ngusolwazi ngokwemfundo kepha angabi nayo imfundiso. Kuyenzeka umuntu abewuqweqwe kwezemfundiso kepha engenaso nesisodwa isicucu semfundo.
Abantu bakithi balahlekelwe yimfundiso.
Umuntu ongenayo imfundiso uyahlambalaza. Umuntu ofundile uneziqu eziphezulu ngisho iminyezane kepha uthuka uyise nonina. Nxa sebedlulile emhlabeni bethi bangamadimoni ngoba bethi baphucuzekile.
Impucuzeko engenayo imfundiso ifile. Inkolo engenayo imfundiso ibonakala ngokufenyisa inkambo yemfundiso. INkosi uJesu Kristu idunyiswa kangaka ngoba yahamba ngemfundiso yayixuba nenkolo kuze kube namuhla.
UMohamede wahamba ngemfundiso wayixuba nenkolo kuze ube namuhla uyaziswa. UShembe uhambe ngalokho uSivananda uhambe ngalokho.
Ngicela ukuba imfundiso siyazi ibe yisisekelo sohambo lwethu, futhi sazi ukuthi yona isuka kokhokho bokhokho bethu, yeza kobaba ikithi; nathi kumele siyidlulise kulabo abasilandelayo. Ngiyema. Ubuntu buyisisekelo sakho konke
Leli gama libanzi, lijulile, lenwebekile, lindlalekile, liphakeme, lide. Omunye njalo ulizela ngobubanzi, angifiki ndawo, omunye ulizela ngokuphakama angafinyeleli esicongweni.
Abanye njalo bafuna ulichaze ngenhlaliswano yesintu, abanye bafuna ukulifekezelisa ngesimo sombusazwe.
Nabo bagcina bengezwani.
Abanye balichaza baze bajike umbala. Befociya ngakohwebo. Abanye njalo balibuka balipopole ngokwemfundo nabo bagcina bekhuluma izindlela lolu hlelo olusebenza ngalo. Abanye njalo ezempilo, ezenjululwazi.
Konke kuhle kepha ukuthi impilo yomuntu womdabu noma wendabuko e-Afrika lisho yena.
Indlela abuka ngayo, agqoka ngayo, ahamba ngayo, adla ngayo, ahweba ngayo, afunda ngayo, axhumana ngayo iwubuntu.
Ngokobuntu imfundiso ihamba phambili, uphawu lomuntu yisona sisekelo. Isimo somuntu amagugu akhe, umnotho wakhe, inkolo yakhe, ulimu lwakhe, konke kusho ubuntu.
Abantu basho indlela umuntu azihlonipha ngayo yena. Ukuphilisana nabanye abantu, isigqi, indlela umuntu axhumana ngayo nabadala isho ubuntu. Indlela yokuhamba kwethu, yokusina eyikuxoxa indaba.
Indlela ondlalela ngayo indaba/ udaba idinga ubuntu.
Ukubuthwa kwabantu benziwa ondenga noma ngabe bakuphi nezwe kepha kabazazi.
Nendlela abaphila ngayo nabenza ngayo izinto icishe ifane. Ubuthina abuhlonishwe. Kalijivazwe ihaba esisebenzisa ngalo ezombusazwe. Indlela esithathe ngayo inkolo nendlela esibuka ngayo imfundo.
Konke lokhu kwembozwe imfundo nemfundiso yasentshonalanga. Sakholwa ukuthi nathi ma-Afrika siza nobuntu kuleyo naleyo mpucuzeko. “Izizwe zonke ziyehluleka ukuthola ikhambi elishaya emhlolweni elichaza linokothise leli elithi ubuntu”.
NoHulumeni wethu naye uyabhadazela nxa kufikwa kuleli gama. Umuntu omncane uyadedelwa kwesinye isikhathi akhule ngendlela eyiyo nontanga bakhe.