Ndodana Uze Usikhumbuze

Ndodana uze usikhumbuze,

Ukuthi:

Ngesakho isikhundla ubhukuda eGazini Ngesikhundla sakho uthando luseGazini, IGazi lisesithandweni ngesiPhambano.

Ngesiphambano kuphambene Okudala nokusha ngothando; Kokusha uthando lubhukuda EGazini lentethelelo ezitheni; EGazini losindiso ezitheni; EGazini losindiso kwabakholwayo.

Usikhumbuze ndodana

Ukuthi:

IGazi okukhulunywa ngalo alunadlame, IGazi okukhulunywa ngalo alinambusazwe IGazi okukhulunywa ngalo alinambangazwe;

Leli Gazi seliyimbokodo kamagayisa Emoneni nasenzondweni kaSathane; Leli Gazi linothando losindiso Kusindiswa ingaphakathi ligezeke; Kusale uxolo kwabentando enhle.

Sikhula ngeGazi elagobhoza ngothando, Sikhuluma ngeGazi elavuka emangcwabeni; Lahlala phakathi kwethu ngoxolo, Lahlala phakathi kwethu ngesibusiso, Lahlala phakathi kwethu ngensindiso;

Lavula izinkantolo zoMphefumulo Lathethwa icala labathetha bonke; Kwahlawuliswa isono kwasinda abantu.

Kwaphela izinkantolo ezingaphandle, Kwavulwa izinkantolo ezingaphakathi; Azinabahluleli kuhlulela insindiso, Kubhucungeke isono ngokubhukuda eGazini;

Ical’ alikhombe kuyen’ ayeke abanye, Axolelane nobuyen’ ayeke abanye; Akangcono kunabo ngokufakaza ngelezitha, Makathethelele ngokufakaza ngosindiso.

Usikhumbuze ndodana,

Ukuthi:

Ezombusazwe nezombangazwe Zingangenwa ngothand’ oluseGazini, Ingaphakathi ligcwale ukudlinza Ngothand’ oluseGazini ngentethelelo; Ngothand’ olunemicabango yokuzidela, Ngothand’ olunemicabango yokuzikhandla; Ngothand’ olunensebenzo yokuzikhandla Kugobhoze uthando eGazini loxolo; Uxol’ olunqamleza inzondo nomona.

Uxolo, angisho lomnquphane; Uxol’ oluyinzalo kaZICABANGELE, Uxol’ oluyinzalo kaZENZELE; Uxol’ olubalekelana nomsindo, Uxol’olubalekelana nehlombe; Uxol’ olubalekelana nobusakabuli, Uxol’ oluqeda udlame ngoNSEBENZO.