ISINKWA SESINCINTI SESINAMONI (CINNAMON SWIRL)
Izithako zesincinti sesinamoni
Ingxenye (1/2) yenkomishi yoshukela omhlophe.
Isipuni sokudla esisodwa (1) sesinamoni egayiwe.
Izithako (isinkwa)
Izinkomishi ezimbili (2) zikaflawa. Ithispuni elilodwa (1) leBaking Soda. Ingxenye (1/2) yethispuni kasawoti. Iqanda elilodwa (1) elikhulu, elingaphumi efrijini.
Ama-150g kashukela omhlophe. Ama-80ml kawoyela wokupheka (ngincoma iCanola).
Ama-80g kakhilimu omuncu noma iyogathi enganongiwe, nengaphumi efrijini.
Ama-160ml obisi olungaphumi efrijini. Ithispuni elilodwa nengxenye (1½) leVanilla Essence
Indlelakwenza
Shisisa uhhavini ngokuwubeka ku177°C.
Lungisa ipani lokubhaka isinkwa ngokulifafaza ngeNon-stick Spray bese ulibeka eceleni.
Isincinti sesinamoni
Endishini encane, thela ushukela kanye nesipuni sesinamoni egayiwe bese uhlanganisa ngokhezo. Beka eceleni.
Isinkwa
Endishini enkulu, sefa uflawa bese ufaka iBaking Soda kanye nosawoti bese uhlanganisa ngewhisk.
Kwenye indishi, faka iqanda noshukela. Hlanganisa ngewhisk kuze kuhlangane ngokuphelele.
Lapho sekuhlangene kahle, thela uwoyela, ukhilimu omuncu noma iyogathi, ubisi, kanye neVanilla Essence. Hlanganisa ngokuphelele.
Qulela izithako ezimanzi kulezo ezomile bese uhlanganisa ngokhezo. Qiniseka ukuthi ingxube kaflawa ihlangana ngokuphelele nezinye izithako. Qaphela ungahlanganisi ngokweqile. Thela ingxenye yenhlama epanini lokubhaka.
Vuvuzela ingxube kashukela nesinamoni phezu kwenhlama, ushiye engalingana cishe izipuni ezimbili.
Thela, ngokucophelela, le ngxenye yenhlama esele phezulu. Uzoqaphela ukuthi inhlama izonamathela engxubeni kashukela. Kuzosiza ukusebenzisa izipuni ezimbili ukuzama ukusabalalisa le nhlama yesibili phezulu.
Vuvuzela ingxube kashukela nesinamoni esele phezulu.
Faka inhlama kuhhavini oshisayo ubhake imizuzu ephakathi kwengamashumi amahlanu (50) nehora elilodwa.
Emva kwemizuzu engamashumi amabili nanhlanu (25) lingenile kuhhavini ikhekhe, beka ifoyili phezulu ukugwema ukuthi lishe phezulu lingakavuthwa kahle phakathi.
Emva kwesikhathi esibekiwe, hlola ukuvuthwa kwekhekhe ngokushutheka uthi lokuvungula phakathi nendawo nekhekhe. Uma luphuma lumanzi kuyobe kusho ukuthi alikavuthwa. Lapho selivuthiwe, uthi luzophuma lomile.
Khipha ikhekhe kuhhavini ulibeke ngaphandle ukuze liphole.
Lapho selipholile ungalisika izingcezu, ulithokozele.
Amasu
Leli khekhe lingahlala kufriza kuze kufinyelele ezinyangeni ezintathu, ngaphandle kokonakala. Qikelela ukuthi ulifaka kuplasitiki bese ulifaka esitsheni esivaleka ngci ngaphambi kokulifaka kufriza.
Lapho usulungiselela ukulidla kade lisefrizeni, likhiphe ulibeke efrijini ubusuku bonke. Lizobe selincibilikile lilungele ukudliwa ngakusasa.
Ngingajabula ukuzwa ukuthi kuhamba kanjani eziko lakho. Lokhu ungakwenza ngokungithumelela i-imeyli ku szungu@ nkzgroup.co.za