Akekho okumele afise ukufulathelwa yidlozi
Lingumzali, liyanakekela, liyavikela kepha khona lapho liyajezisa
Kule ngosi sesikhulume kaningi ngedlozi. Sisho ukuthi liyini, limeleni nokuthi yini elingeyikho. Namuhla ngiyafisa sibuke ukukhuluma okuthi ‘umuntu ufulathelwe yidlozi’. Mhlawumbe asiqale sivumelane ukuthi yebo idlozi liyakwazi ukufulathela noma ukuyekelela umuntu. Kuhle idlozi ulibuke njengomzali noma umvikeli womuntu loyo. Leli dlozi lingaba ngelesifazane noma elesilisa. Libe ngumuntu owahamba esemdala noma esemncane. Usuke engowakwenu ngegazi ngasohlangothini lukayihlo noma lukanyoko. Lona ngumuntu onendaba nawe, okukhathalele ukuphumelela kwakho empilweni.
Ekulibukeni njengomzali yamukela ukuthi nalo liyadumala ngokwenza kwaloyo elimbekile. Isibonelo nje emuva kokukuvikela kokuningi nokuhlelembela impumelelelo yakho bese wena ufulathela ikhaya. Kulesi senzo alikwazi idlozi ukwenama. Lokhu kuvame ukwenzeka kulabo ekhaya abanikwe inhlanhla yokuba notho ukwedlula abanye.
Oyisiwula uvame ukucabanga ukuthi lokhu kungaye, acabange ukuthi ubuhlakani nengcebo le anayo ngeyakhe.
Lo umbona ngokuthi angaba notho bese eba liqhude nje lapha ekhaya, engasalawuleki sekuzwiwa ngaye.
Ugcina engasalihloniphi igceke nemithetho yalo. Engasayihloniphi imisebenzi yalapha ekhaya nemigomo yayo. Usuke esekhohlwe nokuthi lesi sithebe (ingcebo) asiphathisiwe akusona esakhe siqu kepha kumele asabe namalungu omndeni.
Abenza nje baziqhatha nedlozi isibili. Kanti nalo kuhamba kuhambe libadele, libayekelele kubhidlike konke. Kukangaki uzwa ukuthi umuntu wasekuthini wayewutho, emi kahle kepha namuhla useyinhlabathi?
Ungalenzi iphutha lokucabanga ukuthi lo muntu usuke eloyiwe, cha zisuke seziwunqande phambili, usuke esefulathelwe yidlozi.
Uthando mbumbulu
Njengoba abantu sebakhohlakala nje, sesike sizwe kuthiwa omunye emdenini usezakhele uthando mbumbulu nedlozi, sizwe kuthiwe uselenze lajikela abanye labheka yena yedwa. Uma lokho kwenzeka akubi ngunaphakade ngoba kuhamba kuhambe likushaye idlozi.
Okubi ngokufulathelwa nokushaywa yidlozi wukuthi usuke ungatitinywa lapha emhlabeni nje kuphela kepha uma selikukhipha likukhipha ngisho emndenini wabafa bengafi. Uzwe kuthiwa umuntu kasekho kepha ucela ukuba enzelwe inhlambuluko ukuze angene emndenini. Konke lokhu kuwubufakazi bokuxhumana nathi nedlozi.
Ubufakazi bokuthi idlozi liyakubeka emsamo futhi kube yilo elingakubeka emnyango. Akekho-ke umuntu okumele afise ulaka lwedlozi ngoba liyashaya hhayi kancane – Thokoza.