Ukuhaqeka kuHamilton yithuba kuRussel
Umshayeli wezimoto zeFormula One (F1) uGeorge Russell (osesithombeni) uthole ingqayizivele yethuba angasoze alikhohlwa.
Lelo thuba ngelokuthi angene endaweni kampetha womhlaba uLewis Hamilton. Kwenzeka lokhu nje ngoMsombuluko ingqwele kulo mdlalo enguHamilton kuvele izindaba zokuthi ihaqwe ukhuvethe.
Umqhudelwano ozomphutha uHamilton iSakhir Grand Prix, ozobajelwa eBehrain International Circuit ngeSonto kusukela ngele-7:10 kusihlwa.
“Akekho umshayeli oyofana noHamilton okanye ozosondela emlandeweni wakhe. Ukuthi ngingene esikhaleni sakhe kungijabulise kakhulu. Ngiyazi ngeke ngishayele njengaye kodwa ngizokwenza ngakho konke okusemandleni ukuthi ngenze kahle. Ithuba leli lokuthi ngincele ulwazi. Ngibonga kakhulu kubaphathi bezimoto zeMercedes ngokuthi babize igama lami ekutheni kube yilo eliphakanyiswayo kozongenela isikhondlakhondla esinguHamilton,” kusho uRussell oneminyaka yobudala engama-22.
URussell odabuka eNorfolk, e-England ngonyaka wezi-2018 waba ngumpetha weFIA Formula 2 engaphansi kweF1 eshayela ngaphansi kweWilliams.
Abaphathi beWilliams nabeMercedes bakwazile ukuthi baxoxisane ukuthi kudedelwe uRussell ukuba ashayele kwaMercedes ngeSonto lapho ezobambisana noValterri Bottas odabuka eFinlad.
UToto Wolff oyiSikhulu Esiphezulu kwaMercedes ubonge iWilliams ngokuthi idedele uRussell ukuba angene esikhaleni sikaHamilton.
“Okokuqala okubaluleke kakhulu, ngifisa ukubonga iWilliams nokuhamba kahle kwezingxoxo kuze kube sekugcineni. URussell muncane kakhulu futhi ukhombisile ukuthi ngelinye ilanga uyoba ngumpetha weF1 njengoba kade enza kuF2 kodwa ngeke simufakele ingcindezi. Siyakholelwa kuyena ukuthi kukhona azobagadulisa emjahweni wangeSonto. Ngethemba ukuthi uzosebenzisana kahle noBottas onamava,” kusho uWolff.
Eqhuba uthe: “Iminyaka kuHamilton ihambile ingakho kumele siqale silungiselele isikhathi esizayo. Yize iMercedes isiyinqobile isizini yakulo nyaka kodwa sifisa laba bashayeli basinyusele amaphuzu kakhulukazi uBottas.”
UHamilton osebe ngumpetha womhlaba izikhathi eziyisi-7, unxuse uBottas ukuthi alekelele uRussel.
“UBottas unamava amakhulu kuzomele aklame indima yokuba ngumholi kuRussel. Ngibafisela okuhle kodwa, ngethemba ukuthi bazowanyusa amaphuzu akwaMercedes. Njengoba ngihaqwe ileli gciwane nje ngethemba ukuthi ngizosheshe ngilulame, kwazise liyingozi,” kusho uHamilton.
UHamilton waseGreat Britain ubebheke ukuthi aqophe umlando wokuba ngumdlali wokuqala ukunqoba imiqhudelwano engaphezulu kweli-12 kunyaka owodwa. Kuyimanje unqobe eli11 kwemibili esele.
Umjaho wokuvala unyaka uzokuba ngempelasonto ezayo okungowe-Abu Dhabi Grand Prix ozobanjelwa eYas Marina Circuit.
Kuzo ezithinta iF1, indodana kaMichael Schumacher owazakhela udumo kulo mdlalo, uMick ithole izindaba ezijabulisayo zokuthi ngonyaka ozayo izoshayela kuyona iF1 njengoba ibe ngumpetha weF2 kulo nyaka.
“Izindaba zokuthi ngizoshayela kuF1 zingijabulise kakhulu. Okwenza ngijabule ukuthi leli bekuyiphupho lami leminyaka. Ngizimisele ukuthi ngizakhele igama ngokuthi nginqobe imiqhudelwano,” kusho uMick.
Uzoshayela ngaphansi kweHaas lapho ezobambisana khona noNikita Mazepin.