Lizoqhutshwa yize kunzima isiko kwezomphebezo
Umqeqeshi wenkulisa engenye yezihamba phambili eNingizimu Afrika kwezomphebezo, u-Emmanuel Mandla Ngema, we-Emmanuel Ngema Tennis Development uthi yize ingabanga khona imiqhudelwano eminingi kulo nyaka ngenxa yokhuvethe kodwa bazowenza umqhudelwano wenkulisa yakhe wokusonga unyaka.
Lo mqhudelwano obizwa ngeEmmanuel Ngema Tennis Development, uzokuba ngeSonto kusukela ekuseni kuze kube intambama. Uzobanjelwa enkundleni eyikhaya lale nkulisa iWestridge Tennis Stadium, eMayville.
“Yize imiqhudelwano singabanga nayo kulo nyaka kodwa sizoqhubeka nokwenza okuyisiko lethu ukuthi sibe nomqhudelwano wokuvala unyaka. Le midlalo izobandakanya izigaba ezintathu ired dot ball, igreen dot ball ne-orange dot ball. Lapha silindele abadlali abangama-60, abazodlala kuma-single nakuma-double. Emva kwemidlalo kuzobe sekukonyeliswa abadlali abenze kahle,” kusho uNgema.
UNgema uphinde wathi yize lo mqhudelwano ujwayele ukuba uthanyelwe ngabalandeli kodwa nonyaka bazobe bengavumelekile ngenxa yokulandela imiyalelo kaHulumeni yokhuvethe.
Le nkulisa kaNgema ineminyaka eyisi-6 ayisungula kodwa yena uneminyaka engaphezulu kwengama-20 aqala ukuba ngumqeqeshi wezomphebezo.
Njengawo wonke umuntu oshayekile ngenxa yokhuvethe naye uNgema uthe uphazamisekile kwazise ubehlele izinto eziningi kulo nyaka. “Ukumiswa kwemidlalo kusithikameze kakhulu ngoba kudale ukuthi sihlukane abadlali bahlale isikhathi bengazilolongi ndawonye. Besiyihlelile imiqhudelwano yakulo nyaka, kubuhlungu nje ukuthi igcine ingabanga khona. Angeke kodwa sagxeka muntu ngoba phela ukubhuntsha kwayo kungenxa yegciwane eliphume nemiphefumulo eminingi emhlabeni wonke jikelele. Kodwa njengoba sesibuyele enkundleni ekutheni sizilolonge, ngethemba ukuthi kuzoshaya unyaka ozayo sesiyilungele imiqhudelwano,” kusho uNgema.
NgoMasingana umdlali wale nkulisa uNkosiyethu Gumede wahamba wayomela iNingizimu Afrika emqhudelwaneni owawubanjelwe e-Australia.
Imiqhudelwano ebhuntshile iSouth Africa Nationals, owawuzobanjelwa eBloemfontein maphakathi nonyaka. Ababe zonqoba lapho babezomela elakuleli emqhudelwaneni owaziwa nge-International Tennis Federation (ITF) owawuzobanjelwa eCassablanca, eMorroco. Ngokusho kukaNgema abadlali okuyibo ababezomela inkulisa yakhe kulo mqhudelwano kwakuzoba uBongeka Hlongwane, uNonhle Vilakazi noSimphiwe Ngwenya.
Eminye iMini Master Tennis Tournament okuwumqhudelwano odlalwa abadlali abaneminyaka yobudala engaphansi kweli-12, eli-14 kanye neli-16. Kube iTrafalagar Tennis Tournament neInterprovincial Tennis Tournament.
ElaboHlanga libuza uNgema ukuthi ngabe inkulisa yakhe iyaluthola yini uxhaso uvumele phezulu. “Kusukela ngayiqala le nkulisa uxhaso ngiluthola kakhulu. Ngilunikwa inhlangano ephethe umphebezo lapha eNingizimu Afrika iTennis South Africa (TSA) nenhlangano yalapha eThekwini i-Ethekwini Tennis Association (ETA). Indlela abenza ngayo ingenza ngigqugquzeleke ukuthi ngiqhubeke nokufaka lo mdlalo entsheni yaboHlanga, kwazise waziwa ngokuthi owabamhlophe,” kusho uNgema.
Abadlali abaphakamise le nkulisa uNgwenya ohamba phambili kubadlali abaneminyaka engaphansi kweli-14 noKwanele Mpuma naye ohamba phambili kwabaneminyaka engaphansi kweli-14.
UNgwenya nomunye umdlali uSiyabonga Jaca kuyimanje bafunda esikoleni somacaphuna kusale iDurban Preparatory High School (DPHS), mahhala ngenxa yekhono labo.
Inkulisa kaNtusi (abakaNgema) isemabhukwini omlando njengoba isinqobe indondo yegolide kathathu kulandelana emqhudelwaneni waminyaka yonke obizwa ngamaSouth Africa Local Government Association (SALGA) Games.