Umqeqeshi weProteas uthi bazokhokha isibhongo
Kunethemba lokuthi abadlali ababiziwe bazolenzela okuhle leli qembu emidlalweni ezayo
Umqeqeshi weqembu lesizwe lekhilikithi uMark Boucher uthi akumkhathazi ukuthi ezakhe zihlulwe ngompetha bomhlaba i-England emidlalweni yeT20I.
Iqembu iProteas lidlale imidlalo emithathu ne-England, alanganqobanga nowodwa.
Umdlalo wokuqala owaba ngoLwesihlanu olwedlule owawubanjelwe eNewlands, eCape Town, i-England yanqoba ngamawikhethi amahlanu. Kolandelayo obungeSonto eBoland Park, ePaarl, i-England yanqoba ngamawikhethi amane kwathi owokugcina obungoLwesibili kusihlwa eNewlands ompetha bomhlaba bazidlulele kalula benqoba ngamawikhethi ayisi-9.
“Ngeke sakubalekela ukuthi asenzanga kahle kule midlalo emithathu yeT20I. Kodwa engingakusho ukuthi sizoqhubeka nokufundisa abadlali abancane indlela yokudlala esigabeni esikhulu. Okuhle ukuthi laba badlali sibahlola ngeqembu elingompetha bomhlaba. Kuhlezi kunzima ukufunda kodwa uma usufundile zonke izinto ziba lula kakhulu,” kusho uBoucher.
Eqhuba uthe: “Kubuhlungu ukuthi siye kule midlalo singakwazanga ukuzihlola. Siphoqeleke ukuthi singayidlali imidlalo yokuzilungiselela ngenxa yezizathu ezithize. Esikwatini sethu futhi asinaye umdlali ongamsebenzisa ekushwibeni nasekushayeni amabhola obizwa nge-all rounder.”
La mazwe womabili asezotholana emidlalweni wosuku olulodwa, i-One Day International (ODI), ezokuba mithathu. Umdlalo wokuqala wale midlalo uzokuba namhlanje ngoLwesihlanu eNewlands Stadium uzoqala ngehora lokuqala emini. Owesibili wona uzokuba ngeSonto eBoland Park ngehora le-10 ekuseni kuthi owokugcina ubanjelwe eNewlands Stadium mhla ziyisi-9 kwephezulu.
Ngale midlalo uBoucher uthe: “Sinesikwati esikhulu esisiqokele le midlalo ingakho abantu bezobona ubuso obusha. Sineqembu labafana abazimisele lapha abafuna ukuthuthukisa indlela yabo yokudlala. Bafuna ukuncintisana nabadlali abaphambili emhlabeni.”
UBoucher kulindeleke ukuthi kule midlalo abophele u-Andile Phehlukwayo noDavid Miller abebe ngadlali ngenxa yomthetho wemvalelwakhaya. Abanye abadlali okulindeleke ukuthi babonakale kule midlalo uJanneman Malan noKyle Verreynne, bobabili abadlala kahle ngesikhathi iProteas idlala ne-Australia ngaphambi kokumiswa kwemidlalo ekuqaleni konyaka.
Sineqembu labafana abazimisele lapha abafuna ukuthuthukisa indlela yabo yokudlala. Bafuna ukuncintisana nabadlali abaphambili emhlabeni.
Okubuhlungu ukuthi umdlali ohamba phambili ekushwibeni kuleli uKagiso “KG” Rabada ngeke aze abonakale kule midlalo ngenxa yokulimala. Kulindeleke ukuthi abuye emidlalweni ezokuba emva kukaKhisimusi lapho iProteas izodlala eyochungechunge neSri-Lanka.
Selilonke iqembu leProteas lithakwe kanje:
UQuinton de Kock ongukaputeni, uJunior Dala, uFaf du Plessis, uHeinrich Klaasen, uLungi Ngidi noTabraiz Shamsi beMomentum Multiply Titans, uThemba Bavuma, uBjorn Fortuin, uBeuran Hendricks noReeza Hendricks be-Imperial Lions, uGeorge Linde, uJanneman Mala noKyle Verreynne beSix Gun Grill Cape Cobras, uKeshav Maharaj, uDavid Miller no-Andile Phehlukwayo beHollywoodbets Dolphins, uLutho Sipamla noRassie van der Dussen be-Imperial Lions, uJon-Jon Smuts uGlenton Stuurman no-Anrich Nortje beWarriors kube uPite van Biljon weVKB Knights.