KWEZINYE IZINGXENYE
ESOMALIA: Umuntu oziqhumise ngebhomu ubulale amaphoyisa ayisithupha phambi kwesiteshi samaphoyisa enhlokodolobha yaseSomalia iMogadishu ngasekupheleni, ngokusho kwamaphoyisa asole iqembu le-Al Shabaab.
“Amaphoyisa ayisithupha ahlanganisa nomphathi wamaphoyisa aseWaberi aqinisekisiwe ukuthi ashonile kwathi abanye abayisithupha balimala kulokhu kuqhuma,” kusho okhulumela amaphoyisa aseSomalia uMajor Sadiq Aden Ali Doodishe ngesikhathi ekhuluma nabezindaba.
Uqhube wathi lona ozisakaze ngebhomu ubemele iqembu i-Al Shabaab. Akubanga khona ukuphawula ngokushesha kokuba nesandla ekuhlaselweni okuqhamuka eqenjini labashokobezi.
Amavukelambuso e-Al Shabaab alwe kusukela ngowezi-2008 ukuketula uHulumeni omkhulu waseSomalia osekelwa umhlaba wonke ngenhloso yokusungula owayo umbuso osuselwa ekuqinisweni komthetho wobuSulumane. Leli qembu labashokobezi liyaqhubeka nokuhlasela njalo ngezibhamu namabhomu eMogadishu nakwezinye izindawo eSomalia.
EZEPAP: Ilungu lePan African Parliament (PAP) uPupurai Togarepi lthi ngenxa yamandla i-Afrika enayo, izwekazi lisebenze kahle kakhulu empini yokhuvethe.
UTogarepi uthi kwakukhona imibono eyayiphonswa nxazonke yokuthi i-Afrika izobona izinhlekelele ezinkulu ezihlobene nokhuvethe kunanoma iyiphi enye ingxenye yomhlaba. ISouthern African Regional Caucus yePAP ibambe umhlangano kule mpelasonto ukudingida izinkinga ezibhekene nalesi sifunda. Okuphezulu ohambweni lwayo kwakuwumzabalazo waseMozambique nobuphekula kanye nempendulo yesifunda kubhubhane ukhuvethe. UTogarepi unezele wathi “Bantu baseAfrika, ohulumeni bethu bafaka izindlela ezisize ukunciphisa lesi sifo.”
ELIBYA: Isikhulu esiphezulu eMkhandlwini kaMengameli omusha waseLibya siphikile ngoMgqibelo ukuthi amaqembu angene ehhotela lapho kuhlangana khona loMkhandlu abehlomile noma asebenzise amandla, edambisa isigameko esivele siveza ubungozi obubhekene noHulumeni wobumbano.
Phambilini, okhulumela uMkhandlu wayethe amaqembu abehlomile agasele ehhotela laseCorinthia ngoLwesihlanu, yize ethe ubengekho umuntu obevela kulo Mkhandlu ngaleso sikhathi. “Bekungekho ukuthunjwa, ukuqhuma kwesibhamu noma ukuhlaselwa kimi noma ehhotela,” kusho inhloko yehhovisi loMkhandlu kaMengameli, uMohamed al-Mabrouk kuvidiyo efakwe enkundleni zokuxhumana, wengeza ngokuthi ubekade esehhotela ngesikhathi kwenzeka lokhu.
UMabrouk uthe inhloko yoMkhandlu kaMengameli, esebenza njengenhloko yezwe iLibya okwamanje, izohlangana namaqembu athintekayo.
UMkhandlu kaMengameli wakhethwa ngenqubo eyenziwe lula yinhlangano i-United Nations (UN) eyaphinde yakhetha uHulumeni Wobumbano Lukazwelonke owaqala ukusebenza ngoNdasa, kukhishwa esikhundleni iziphathimandla eziphikisanayo empumalanga nasentshonalanga. Amaqembu ahlomile azinze entshonalanga neLibya azwakalise intukuthelo kuHulumeni ngoNgqongqoshe Wezangaphandle, uNajla al-Mangoush.
UNdunankulu Wobumbano u-Abdelhamid Dbeibeh usebenze ukuze azuze ukwesekwa emaqenjini aphikisanayo eLibya, wakha isizinda esikhulu esibandakanya inqwaba yabantu abanemibono kanye nezifunda ezihlukile. Kodwa-ke, bobabili uMkhandlu kaMongameli kanye noHulumeni Wobumbano Lukazwelonke babhekane nokugxekwa kwangaphakathi nezinselelo egunyeni labo.