KWEZINYE IZINGXENYE
EDRC: Kuqinisekiswe icala le-Ebola empumalanga neDemocratic Republic of Congo, kusho uNgqongqoshe wezeMpilo ngoLwesihlanu, ngemuva kwezinyanga ezinhlanu kuphele lesi sifo esivele lapho. Akwaziwa ngokushesha ukuthi leli cala lihlobene yini nokuqubuka kwesifo esabulala abantu abangaphezu kwezi-2 200 empumalanga yeCongo, okungowesibili ukubulawa kwabantu emlandweni, noma ukuqhuma okwabulala abayisithupha kulo nyaka. Umfana oneminyaka emithathu ubudala utholakale enesifo eduze kwedolobha elisempumalanga yeBeni, okungenye yezindawo ezibheduke lesi sifo ngowezi-2018 nowezi-2020, futhi ushone ngenxa yalesi sifo ngoLwesithathu, kusho uNgqongqoshe wezeMpilo uJean Jacques Mbungani esitatimendeni. Balinganiselwa kwi-100 abantu okungenzeka ukuthi balitholile leli gciwane futhi sebetholakele manje sebezobhekwa ukuthi banazo yini izimpawu ezithile. Umbiko wangaphakathi ophuma elabhorethri yezokwelapha yaseCongo uthe omakhelwane abathathu bojahidada endaweni yaseBeni enabantu abaningi eButsili nabo baveze izimpawu ezihambisana ne-Ebola ngenyanga edlule base beshona, kodwa akekho noyedwa ohloliwe. ICongo iqophe ukuqubuka okuyi-11 selokhu lesi sifo, esidala ukuhlanza okukhulu nohudo, futhi sisatshalaliswa ngokuthintana noketshezi lomzimba, satholwa ehlathini elisenkabazwe eliseduze nomfula i-Ebola ngowe-1976.
EZAMBIA: IZambia okuyizwe elicebile ngethusi ibhekane nenkinga enkulu yokuphela kukagesi ethinte izingxenye eziningi zezwe ngoLwesihlanu ngemuva kwenkinga esiteshini esibalulekile sokuphehla ugesi, kanti inkampani yombuso ithe iyasebenza ukubuyisa ugesi. “Kube nokulahleka kwesizukulwane esiteshini samandla kagesi eKariba North Bank futhi lokhu kuthinte ukunikezwa kwendawo enkulu yezwe,” kusho okhulumela inkampani kagesi uJesse Kunda wenkampani ephehla ugesi iZesco. Izakhamizi enhlokodolobha iLusaka kanye naseKitwe naseNdola okuyizindawo okutholakala khona kakhulu ithusi zithe azibanga nawo ugesi.
EMALI: ISistela laseColombia, elathunjwa ngowezi-2017 ngamasosha eMali, likhululwe ngoMgqibelo. UGloria Cecilia Narvaez (osesithombeni) wathunjwa yiqembu elixhumene ne-al Qaeda elibizwa ngeMacina Liberation Front ngoNhlolanja kowezi-2017 ngasemngceleni neBurkina Faso. Ukhululwe ngemuva kokucela usizo eFrance, kusho iPhini likaMengameli waseColombia kanye noNgqongqoshe Wezangaphandle uMarta Lucia Ramirez. UNarvaez ubonakale emamatheka ngesikhathi ehlangana noMengameli wesikhashana waseMali u-Assimi Goïta ngemuva nje kokukhululwa kwakhe. Ukuthumba kube ngumthombo wemali oholela kahle emaqenjini asesifundeni saseSahel esiseNtshonalanga Afrika, lapho elwa khona namabutho ezwe, amabutho aseFrance kanye nabagcini bokuthula be-UN. IHhovisi likaMengameli alizange lisho noma ngabe kukhona yini isihlengo esasikhokhelwe ukukhishwa kukaNarvaez.