Ubu-Afrika obuyokhulula aboHlanga emakhamandeleni ezomnotho
Kumnyama ebusweni benkawu. Kusekude phambili kithina bantu boHlanga baseAfrika, baseNingizimu Afrika. Sizitshela ukuthi singcono kunabanye ngenxa yezinto esiziphethe, esizisebenzisayo nesazifunda ezingokomqondo wabamhlophe baseNtshonalanga, nezimishini.
Kunenkulumo kaMnu uBheki Cele uNgqongqoshe Wamaphoyisa, eyaye idlalwe emisakazweni, lapho ekhuluma ethi; “Basibambe ngobhongwane”.
Yize abanye bethu abafundile nabangafundile, sebenza sengathi ukubanjwa ngobhongwane, ukuqhwagwa nokugwamanda kwamandla ombuso waseNingizimu Afrika kwaqalwa ngabomndeni wamaNdiya akwaGupta.
Ekubeni i-Afrika yonke yaqala ukubanjwa ngobhongwane, yaqolwa okwayo ngaphansi kwegama lobuKhrestu ngabefundisi bezimishini mzukwane befaka umoyamqondo wedemokhrasi, owawuhambisana nobukoloni, nempucuzeko yamazwe abamhlophe baseNtshonalanga, eminyakeni engamakhulu amabili edlule.
Kwakungumoyamqondo wezemfundo, ezolimo, ezokwelapha, ezenkolo, ezomthetho, ezepolitiki ezingumqondo wabo waseNtshonalanga nowase-United States of America.
Bangagcina lapho abaseNtshonalanga, baqapha, namanje basaqaphe ngelokhozi ukuthi awufakwa nakancane umoyamqondo waseMpumalanga wobukhomanisi baseRussia emiqondweni yaboHlanga base-Afrika nakwamanye amazwe.
Kwakunemfundisoze noma inkoloze yabamhlophe nabanye abantu abamnyama ngobukhomanisi, ukuthi babuzokwenza abantu bamazwe aqhuba ngabo baqolwe izinto zabo bahlupheke.
Ngangingakholelwa ngoba nganginombuzo namanje ngisenombuzo wokuthi ubukhomanisi babungalungile. Ngangithi ubukhomanisi abuqhamukanga nezimishini nobuKhrestu kamye nemali, abuthathanga umhlaba abusungulanga
imfundo nesayifunda ezikoleni engumoyamqondo wabamhlophe baseNtshonalanga.
Seyifundiwe, isafundwa imfundo nempucuzeko yaseNtshonalanga ngaboHlanga. Kodwa sisehluleka noma sisesaba ukutshala umoyamqondo waseAfrika ebelungwini baseNtshonalanga nabase-United States of America.
Kwaba sengathi aboHlanga babengenazo ezemfundo, ezolimo, ezokwelapha, ezenkolo, ezomthetho, ezomnotho, izikole ezazingokomoyamqondo wabo besadla ngengqwembe endala (besalibusa izwe), okhokho bethu.
Ayikazimeli i-Afrika ikakhulukazi ngezomnotho yize seyisemagunyeni aphezulu emfundo. AboHlanga basazeya, basazingabaza, siyazingabaza uma sekuzuziwe ngokwaseNtshonalanga.
Okwani ukufunda uma izinto ziphethwe ngesinxele ngabaphathisiwe amagunya ngenxa yobusela, yomgolo, yobuphixiphixi nokubulalana abakwenzayo e-Afrika?.
Kuyacaca manje ukuthi abeANC, ngenkathi besekudingisweni nangaphakathi babengaxoxi ngohlobo lwezomnotho ababezolusebenzisa uma i-ANC isiphethe izwe njengoba sekwake kwabalulwa ngabanye be-ANC nezinye izinhlaka.
Ngamanye amazwi omengameli, abaholi, osopolitiki baboHlanga nabanye, bayehluleka ukuveza uhlobo lomnotho ngendlela yabo. Kwala ngisho befunde ngezomnotho wasemazweni aseNtshonalanga nalapha ezweni, ukutshengisa ukuthi izwe sebeliphethe.
Besaba ukuvumelana noMnu uMuammar Gaddafi owayenguMengameli waseLibya, eveza uhlobo lwemali ngowezi-2009, eyayingokomoyamqondo, neyayingasetshenziswa i-Afrika.
Kwabe usegadlile eNtshonalanga. Phela abamhlophe bayamnyemfisa, bayambulalisa owoHlanga, umengameli wase-Afrika ozodlelana namazwe aseMpumalanga, ikakhulukazi ubukhomanisa, nozozama ukufaka umoyamqondo wase-Afrika phezu kowaseNtshonalanga.
Yingakho ezinye izinhlanga zihlale zibahleba, zibathuka, zibangcofa, aboHlanga ngoba abakabi, asikakabi nohlobo lwezomnotho abazisungulele kuze kube manje. Ngelinye ilanga siyoba nokwethu siyi-Afrika, kungabe kusahlekiswa ngathi.
AmaBhunu akwazi kusukela kowe1948 ukuqhamuka nohlobo lwemali engokomqondo wawo emva kowe-(196), ukukhombisa umhlaba ukuthi ayesezimele kwezomnotho.
Afaka uhlobo lwemali yamarandi esikhundleni sopondo waseBritain owawusetshenziswa. Agudluza nemali okwakuthiwa usheleni, afaka eyamasenti. AmaBhunu esaphethe izwe, abhala nemali yamasenti ukuthi: “Unity is Strength”, okusho ukuthi ubunye bungamandla.
Namanje asemunye.
Mihle impela imibhalo yize ingasho ukuthi aboHlanga sebeqhoqhobele ezomnotho. Ibhalwe emalini engamarandi amabili ethi “Freedom of Religion, Belief and Opinion 1994-2019”. Eyamarandi ayisihlanu ethi: “Let us Live and Strive for freedom 1994-2019”, nothi “South African Reserve Bank 100 Years 2021”.
Osopolitiki boHlanga abangasikhohlisi beqamba amanga ngoba begaqele ukuphatha izwe. Abasho esidlangalaleni ukuthi abamhlophe basemazweni aseNtshonalanga nabasemazweni abo, basaphethe, baqaphe ngeso lokhozi ezomnotho.
Abamhlophe, baqala ngokubhidliza imithangala yomoyamqondo wobuAfrika eyayingaphansi kwaMakhosi. OkwakuyiNkosi uHintsa kwesamaXhosa, iNkosi uMzilikazi wamaNdebele, uSobhuza Wokuqala kwesamaSwati, iNkosi uMahikeng kwesabeTswana, uKgosi uMoshoeshoe wokuqala kwesabeSotho, uSekhukhuni kwesabaPedi, uRamabulana kwesabaVhenda, uSunduza Mhinga Wokuqala kwesamaTsonga, uSoshangane Ndwandwe kwesamaShangane noCetshwayo kaMpande kwesamaZulu.
SekungaboHlanga e-Afrika, eNingizimu Afrika nakwelikaMthaniya esesibabona bebhidliza uBukhosi. Behluleka ukufaka uhlobo lwezomnotho oluzovuna i-Afrika. Babefundelani uma bezobhidliza okwaboHlanga.
Abagaqele ukuba yiNhloko yaBehluleli eNkantolo YoMthethosisekelo, ababuzwa ukuthi bazoyifaka yini inqubo yezomthetho ewumoyamqondo waboHlanga.
Izwe iCuba lazimela kwezokwelapha ikakhulukazi lasiza namazwe amaningi kanye neNingizimu Afrika phezu konswinyo olwaluholwa yi-United States of America namazwe aseNtshonalanga, emva kowe-1958. Yayithathe imisebenzi yezinkampani ezazimele nomhlaba yakufaka ngaphansi kukaHulumeni.