INkatha isuleke izinyembezi idla iwadi ebiphethwe i-ANC eMhlathuze
Kungakapheli ngisho isikhathi esingakanani iqembu lepolitiki Inkatha Freedom Party (IFP), kade igubhuzelwe ifu elimnyama ngokudlula emhlabeni kwalowo ongumsunguli walo uMntwana wakwaPhindangene selisuleke izinyembezi ngokuqumba phansi i-African National Congress (ANC) okhethweni lokuchibiyela.
I-IFP inqobe okhethweni lokuchibiyela ebelikade luqhubeka ngoLwesithathu kuWadi 13 ngaphansi kwaMasipala waseMhlathuze, phambilillni leli Wadi beliphethwe i-ANC.
INkatha inqobe lolu khetho ngamavoti ayizinkulungwane ezingama-2 724 ihlula, i-ANC yona ithole ayi-2 348 kwathi i-Economic Freedom Fighters (EFF) yathola angama-EFF angama-31 kuphela.
Lokhu kunqoba kwaleli qembu uWadi 13 kulenze lalingana ne-ANC eMkhandlwini waseMhlathuze, ezihlalweni ezingama-67 zoMkhandlu.
I-IFP ne-ANC manje babambe izihlalo ezingama-25, okushubisa kakhulu umbango. IDemocratic Alliance (DA) igcine izihlalo eziyisishiyagalombili, i-EFF yona ineziyisithupha. IFreedom Front Plus (FF+), African Christian Democratic Party (ACDP), neNational Freedom Party (NFP) bona babambe esisodwa sihlalo iqembu ngalinye.
ElaboHlanga likhulume neMeya kaMasipala uMhlathuze uMnu uXolani Ngwezi uyena ophinde abe ngusihlalo wesifunda, nothe kuyathokozisa ukuthi banqobile.
“Ukudlula emhlabeni kaMntwana wakwaPhindangene, abaningi babhale okanye bahumushe ukuthi iqembu lizohlukana phakathi. Ukunqoba kwe-IFP uwadi 13 kufakazele ukuthi iqembu lisazoqhubeka liye phambili” kusho uMnuz uNgwezi.
Njengoba sekusondele ukhetho lukazwelonke oluzokuba ngowezi-2024, lokhu kunqoba kuthumela umyalezo ocacile wokuthi i-IFP inamandla amakhulu esifundazweni iKwaZulu-Natal. “Sibonga kakhulu kubantu baseMhlathuze ngokuthi basethembe. Siyathembisa ukuthi sizoqhubeka nokufeza izidingo zabantu okuyinto eyabe ihlezi igqugquzelwa uMntwana wakwaPhindangene. Lapho akhona siyafisa uMntwana waKwaPhindangene ukuthi abe nathi” kubeka uMnu uNgwezi.
Kwisitatimende esikhishwe ileli qembu emva kokudla umhlanganiso kuWadi 13, sithe: “siphonsela inselelo ikhansela elisanda kuqokwa uMnuz Sibusiso Ndunakazi ukuthi lizinikele ekuletheni izidingo kubantu bakuWadi 13, okubalwa iMabuyeni, Ndesheni, eMpembeni, naseMkhobosa aphinde abahloniphe abantu. Iqembu LeNkatha Yenkululeko lisazibophezele ekusebenzeleni imiphakathi yethu, ukugcina izimiso zethu kanye nokulingisa ifa loMntwana wethu uMangosuthu Buthelezi” kusho isitatimende.