Liyahodloka izwe sibhekile, sophaphama kudala sekonakele
Yithi zakhamuzi okumele sibhukule siphakame kungenjalo sosala phansi kungasekho ukukhala
Kwake kwanenkulumo eyabe isikitaza njengesizwe. Lenkulumo yabe ithi iNingizimu Afrika yizwe elihamba phambili. Ababesho njalo babebalula izinto eziningana nababezibeka njengobufakazi balenkulumo. Esinye nje sezizathu kwabe kungumthethosisekelo wezwe ezabe zithi izimfundimane nosodemokhrasi ‘uhamba phambili’ enhlabeni. Elakuleli ngenxa yalomqulu labe lituswa ngokukwazi ukuqinisekisa ukuhlukana kwamandla phakathi kwabashayimthetho ephalamende, isigungu sokuphatha nesiholwa ngumengameli wezwe kanye nezinkantolo. Okunye okwabe kuthiwa kuhamba phambili zinkantolo zakuleli okwakuthiwa zijuqa kwasani okungakhathaleli ukuthi umuntu loyo unasikhundla sini.
Uhulumeni wedemokhrasi wabe unenjongo eyodwa kakhulu manxa kufika ngasohlangothi lwababecindezelwe , aboHlanga. Inhloso lena kwabe kuwukuqaqa phakathi kokunye amakhamandela obubha, ukuninkeza iningi lezakhamuzi zakuleli isithunzi esabe semukwe yimithetho kanjalo nohulumeni wobandlululo. Lesi sithunzi sabe sisho ukuthi aboHlanga kuleli nabo bazoba yingxenye yomnotho kanjalo nengqalasizinda yezindawo ababehlala kuzo ilungiswe noma yakhiwe ibe sezingeni.
Namuhla ekhasini lesi3 sishicilele ukuwodloka kweTheku nokuyinto elihlazo kuhulumeni osiphethe nenhlamba kuzinkulungwane zabantu bakuleli. Lokhu kuwodloka akukho eThekwini kuphela kepha kukhona kuwo onke amadolobha
KwaZulu -Natal nasezweni jilkelele. Lezi yizinkomba nobufakazi bokuthi uhulumeni wedemokhrasi wehlulekile ukubuyisa isithunzi seningi lezakhamuzi zakuleli uma kufika kwingqalasizinda
Ngeshwa akugcini lapho ngoba nangasohlangothini lomnotho izwe liguqe ngamadolo. Indlala ezindaweni zakobantu iliqiniso lemihla ngemihla. Kuze kube yimanje imfundo nokuyinto emqoka ayikabi yisiqinisekiso sokuthi umfundi loyo osegogodile uzoba wutho uma kufika kwezomnotho. Lesi simo sishabalalisa amathemba abaningi. Esinye isimo esikhathazayo kuleli yileso sobugebengu. Lesi sihlava kasikho nje kuphela kubantu okuthiwa ‘ baphansi’ kepha sikhona nakuzo izikhulu zikahulumeni ezinukwa nsuku zaphuma.
Udaba lwegazi yilo elivala ibhayibheli. Kubi lapha phandle njengoba lesi simo singacijisi nje imikhonto emiphakathini kepha sidlavuza nomnotho wezwe. Izisulu ezinkulu lapha ngaboHlanga ezindaweni zakobantu. Emasontweni edlule elaboHlanga libhale ngosizi olwembathe amabhizinisi aboHlanga emalokishini nasemakhaya lapho ugesi uke uphele nje izinsuku ezintathu kungabi ndabazalutho ngoba kakade akekho onendaba.
Zonke lezi zimo nezinye zikhomba ukuwodloka kwezwe. Zikhomba ingozi esiphikelele kuyo nengalenza ekugcineni izwe leli libe ngumlotha. Kukithi zakhamuzi, kulele kithi ukuba silihlenge izwe leli ngokuba sibe yingxenye yokubuswa kwalo. Lokhu kusho ukuzibandakanya ngale kokhetho ezindabeni ezithinta izwe.