UBiden usecula elinye iculo ngempi ekwa-Israeli
UMengameli wase-United States uJoe Biden nethimba lakhe bashintshe ngokuphawulekayo ukuphawula kwabo ngesimo sempi ephakathi kwa-Israeli neqembu iHamas ezinsukwini ezisanda kwedlula, besuka ekwesekeni okungagudluki kwe-Israeli bagcizelela isidingo sokuvikela izakhamuzi zasePalestine eGaza ngaphambi kokuhlasela okuqhubekayo kwe-Israel.
UBiden akakayishintshi inkolelo yakhe yokuthi i-Israel inelungelo kanye nesibopho sokuzivikela ngemuva kokuhlasela kwamasosha eHamas ngoMfumfu ziyisi-7 okwabulala abantu abayi-1 400 eningizimu ye-Israel, kusho abasizi bakhe. Kepha inani lokufa kwabantu basePalestine elanda ngokushesha, ubunzima bokukhulula abathunjwa yiHamas kanye nokukhala okukhulu okuvela ezizweni zama-Arab, ababambisene nawase-Europe kanye nabanye abantu baseMelika, kuphoqe ithimba likaBiden ukuthi leseke ikhefu lokusiza abantu ekuhlaselweni kukaIsrael futhi ligxile ekutholeni usizo kubantu basePalestine, ngokusho kwemithombo eminingi ngaphakathi nangaphandle kwahulumeni wakhe (Biden).
Isikhulu eWhite House sithe ukuguquguquka kwephimbo kusekelwe “emaqinisweni aphansi” eGaza nenkinga yobuntu eyandayo kanye “nezingxoxo zethimba likaBiden namazwe jikelele.”
Kuke kwaba nokungavumelani ngemuva kwezigcawu phakathi kukaBiden nabeluleki bakhe ngomyalezo waseMelika, kusho omunye owayeyisikhulu esisaxhumana nezikhulu ezikwithimba likaBiden. “Sibone inguquko isuka ohlotsheni lokwanga okungenamibandela kwaIsrayeli kuya kokunye okuncane,” kusho lowo owayeyisikhulu.
Uhulumeni kaBiden ubungalindele ukuthi abalimele basePalestine bande ngokushesha njengoba kwenzekile - manje sebengaphezu kwezi-7 000 abashonile eGaza, kusho izikhulu zendawo - noma isimo sobuntu siwohloke ngokushesha okungaka, kusho isikhulu saseMelika esicele ukungavezwa.
UBiden, oneminyaka engama-80, uguquka-nje ubhekene nenselelo yokhetho lowezi-2024, izinsongo zabanye abangaba abalandeli bakhe ukuthi bazogodla amavoti abo ngenxa yokungasekeli kwakhe amaPalestine, kanye nesexwayiso esivela kulowo owayenguMongameli uBarack Obama sokuthi isenzo se-Israeli singase sibe nemiphumela emibi kusasa.
Izikhulu zakwa-Israel kanye nabasekeli bazo base-US bazwakalise ukukhathazeka ngasese kwabakwaReuters ukuthi njengoba isikhathi esiningi sidlula kusukela ngonya olwenzeka ziyisi-7 kuMfumfu ngesandla seHamas, yilapho umhlaba uzogxila kakhulu ekufeni nasekubhujisweni kokuhlasela kuka-Israyeli eGaza.
Abeluleki bezempi baseMelika abathunyelwe kulesi sifunda banxusa ozakwabo bakwa-Israel ukuthi baqaphe ngoba noma yiliphi ibutho elihlaselayo lizobhekana nezindawo zokulwa ezinzima kanye nempi yamahubhe namabhilidi avaleleke okungase kwandise abalimele kumasosha akwa-Israel kanye nezakhamizi zaseGaza, umthombo ohlukile owazi kusho izingxoxo.
Ekuphawuleni okungajwayelekile mayelana nenkinga yenqubomgomo yezangaphandle u-Obama, umanduleli waBiden eqembini lamaDemocratic kanye nowayengumphathi wakhe, uxwayise kuleli sonto ukuthi ukunqamula ukudla namanzi okuya eGaza okwenziwa wuIsraeli “kungenza izimo zengqondo zasePalestine zibe lukhuni izizukulwane ngezizukulwane.”
IWhite House ayizange iphendule lapho ibuzwa ukuthi ngabe uhulumeni kaBiden usuke waxoxisana yini nalowo owayengumengameli waleliyalizwe uObama.