Siyethemba abafundi angeke baphazanyiswa ugesi ekubhaleni
UMotshekga usebambe isikhundla esifanayo iminyaka eminingi kodwa izinkinga zisalakanyana
Isonto esilisongayo lingelimqoka ezweni nakubafundi ikakhulukazi bakwamatikuletsheni njengoba ukubhala kwezivivinyo kuqalile ngasekuqaleni kwalo okubhekeke ukuba kusongwe ngoZibandlela. Obekwenza abafundi nabazali bangathembi lutho kakhulu kube nayizinkulumo eziqhamuka nxa zonke ezikhulwini zikahulumeni ezithi nazo zizithola zisebumnyameni ngokuthi kuqhubekani ngogesi. Kwaba ngesifanayo nangonyaka odlule ngalesi sikhathi lapho uNgqongqoshe Wezemfundo Emazingeni Aphansi uNkk u-Angie Motshekga naye wakhala esifanayo ngogesi, okwenza abafundi bangazi ukuthi empeleni ngubani okumele bakhale kuye uma kunje.
Kuyacaca ukuthi lukhulu luyeza lunyanyelela ngogesi ngoba ngesikhathi kuqhubeka imidlalo yeNdebe yoMhlaba eFrance konke bekuhamba kahle, kuthe ingaphela kwasuka lokho. Okunzima kakhulu ukuthi kwenzeka ngesikhathi sekuqala izivivinyo zimamatikuletsheni nasemanyuvesi.
Khona kunjalo kuyaxaka ukuthi uma nalaba esibakhethile okuyibo esibathwele ngeqoma njengamehlo nezindlebe zethu ePhalamende besebumnyameni, thina esisemazingeni aphansi kuyacaca ukuthi asikho ndawo.
Nakulokhu uMotshega uphinde wakugcizelela ukuthi benze konke ngasohlangothini lwabo ukuqinisekisa ukuthi azikho izimbuzi, nokuthi abafundi abakopeli, kodwa uma kuziwa kugesi lingazwakali izwi lakhe.
Siyakholwa ukuthi kusekuningi okusadinga ukwenziwa ukuphucula izinga lemfundo ikakhulukazi ebangeni likamatikuletsheni ezweni kunokuba kuqhakanjiswe izinto okumele vele engabe kudala zalunga.
Ukusayinwa kwesivumelwano sokuzibophezela kubazali nabafundi ngesikhathi sokubhala izivivinyo esibizwa nge“Commitment Agreement” yizinto okungacaci ukuthi kukhona okusha okuzoza nakho ekuphuculeni imiphumela kamatric, ikakhulukazi ezikoleni zethu.
UNgqongqoshe uMotshekga nguye kuphela ungqongqoshe osebambe isikhundla esisodwa iminyaka eminingi. Ngokwesipiliyoni asenaso kulo mnyango kufanele engabe konke sekwalungiswa.
Minyaka yonke leli phephandaba lihlala likuqhakambisa ukulungiswa kwezinto kumatikuletsheni, kepha esisuke sikusho ukuthi kumele kuqalwe esigabeni sokuqala lapho ingane ingena khona esikoleni kucentshwe khona ukuze kuthi kuqanjwa kufike kuleli zinga indima enkulu isihlakuliwe.
Nakulokhu sihlalele ethembeni ukuthi abafundi bazokwenza kahle, naphezu kwezingqinamba eziningi abaphila ngaphansi kwazo. Akubona abafundi kuphela nothisha iyabakhathaza eyokuthi izinsizakufunda ziza kancane.
Asingabasoli abanye bakithi abadela okuningi bathathe izingane zabo bayozifundisa ezikoleni ezizimele, yingoba basuke bezizamele okuncono.