Ubuso bubodwa buxoxa indaba ngobuhle
I-Eseyi Owesifazane uziphophotha yize emuhle isidalwa, kubhala uMuntu Xulu
Emlonyeni egcotshwe ngesibhuda esibomvu ngokugqunqile esasenza umlomo wakhe ufane nowentshiyane. Kwathi uma ngimbheka ezandleni ngafica ukuthi nezinzipho zigcotshwe ngalo ibomvu elisemlonyeni. Angizibonanga-ke izinzwane ngoba wayecathulele. Ngiyakholwa ukuthi nazo zaziyogcotshwa ngensoyi, kwala khona ukuthi wayecathulele. Lokhu ukudiya ubuso kwabantu besifazane yinto yasendulo.
AbeSuthu bona benza izingonywana eziyizindingilizana ezihlathini abazibiza ngokuthi “amatubatuba”, abanye-ke lezozingonywana bazizungezise ngamachashazana amancanyana amnyama. Abanye bala benawo amatubatuba, bedlule ngokwenza amatomu asuka ngasemlonyeni aze ayokuma ngezindlebe. Nabo-ke bayasho ukuthi yiwo amatomu.
Lamatomu afana ncamashi nalokhu kokubhala umzimba womuntu abakubiza ngokuthi yi“tattoo”. Ufice umuntu ezidwebe izimvemvane, izimbali, abantu, izinyoka, izipokwe, izimoto, izinyamazane ngisho noSathane imbala. Konke lokho kwenzelwa ubuhle njalo.
Abesifazane bamaNdiya bona baze bafake izinkanyezana ezicwebezelayo phezu kwamakhala, bese benza ibala eliyindingilizana ebunzi. AmaBhaca-ke wona ubuhle bawo busekusikeni ubuso. Athi-ke yisiko lawo.
UZulu yena obakhe ubuhle wabubona ezindlebeni. Uklekla maqede afake iziqhaza ezimibalabala ezindlebeni.
Naye-ke uthi ukuklekla lokhu kuyisiko. Uma umuntu engakleklile kuthiwa igazi elibi akalikhishwanga, futhi umuntu onjalo udla amaphela. Mina ngiyakwala lokho ngoba baningi abangakleklile abawadli amaphela, negazi elibi abanalo.
Ngisho nabo abakhishwa igazi elibi ngokuklekla, nabangawadli amaphela, sengibabona sebethunga izindlebe manje, banengiswa yilaba abangalikhiphanga igazi elibi nabandla amaphela ngokuyilokhu bebachwensela ngokuthi: “Zulu, sithini isikhathi endlebeni?” Umuntu ubonwa ebusweni ukuthi muhle. Yingakho njena kuchithwa isikhathi esiningi kangaka kulungiswa isikhumba sobuso, sigqotshwa ngezinongo zezinhlobonhlobo.
Okuyikhonakhona kukhathaza du, yikuthi onebala elimnyama akasalifuni, usefuna elikhanyayo neligqamile. Usefuna ukuba nesikhumba esithambile nesincwaba. Konke lokho-ke yimali. Imali yokhilimu abomile nabangamanzi, ophomede, nophawuda, nopende bamashiya nezinkophe, izigobhe, izihlathi, imilomo, ngisho nezinzipho imbala.
Uma owesifazane esenjalo, futhi esevunule eziconsayo, esezifafaze ngamakha neziqholo zaseGibhithe, esefana nempigogo emibalabala, esehambela phezulu, noma eyacaza, nalapho esekuthi laphalazi ngawejuba, uyobhema ukholwe uma wena owesilisa ukubonile konke lokho, wakufinyeza wakuhlanganisa ngazwi linye elithi: “Umuhle!” Wo, awuyikuconsa ungesiwona amanzi.