Ukhala ngokubulawa kwabantu owe-CPF
NAPHEZU kwezibalo zobugebengu ezikhombise ukwehla, ngesikhathi zimenyezelwa nguNgqongqoshe Wezamaphoyisa uMnuz. Fikile Mbalula, kodwa usiHlalo wohlaka olulwisana nobugebengu eKZN akeneme neze.
UMnuz. Prince Mathenjwa ohola uhlaka lwe-CPF ubalise kakhulu ngokwenyuka kwezibalo zokubulawa kwabantu.
‘Yize sizemukela izibalo ezikhishwe nguNgqongqoshe uMbalula ngokwehla kobugebengu, kodwa lempi idinga ukufakwa umfutho omkhulu.
‘Sikhathazekile ngezibalo eziphezulu zamacala okubulala esifundeni iKing Cetshwayo, ikakhulukazi eSikhaleni, Empangeni nase-Richards Bay.
UMathenjwa uthe ukudunwa kwezimoto kuyabakhathaza kakhulu.
‘Ukuthathwa kwezimoto ezingamaveni sekuphenduke insakavukelwa umchilo wesidwaba. Sihlaba ikhwelo nakulabo asebethathelwe izimoto ukuba baphumele obala, babike ngalezi zigameko kithina nasemaphoyiseni.
‘Ngalokhu sihlose ukuthi sidlulise isikhalazo esiphelele kuMongameli uZuma, simnxuse ukuba agunyaze amaphoyisa akuleli, awele umngcele waseMozambique, ayolanda lezimoto ezithathwe ngokungekho emthethweni.
‘Sesikutholile ukuthi zonke lezi zimoto bezithathwa lapha ziweliswe umngcele ziye eMozambique. Kunesakhamuzi sasOndolo esisanda kuba yisisulu salobugebengu. Sintshontshelwe izimoto zaso ezimbili, okuyi-Toyota Fortuner ne-Amarok sisemzini waso, zathathwa ngenkani.’
UMathenjwa ubuye wagxeka nokushintshwa kwabaphathi bamaphoyisa, ethi lokhu kwenza lungabi bikho uzinzo.
‘Sizoyinqoba kanjani impi yobugebengu uma sinabaphathi bamaphoyisa abangasebenzi ngokugcwele, abangamabamba. Uma ubheka kusukela kuzwelonke, sineBamba likaKhomishana wamaphoyisa, naseKZN sineBamba likaKhomishana, ngisho esiteshini samaphoyisa sasEkhombe, eNkandla, nakhona kunebamba.
Ukwethenjwa
UMathenjwa ophinde abe yiKhansela likaMasipala waseMhlathuze uthe wegculisekile ngokwethenjwa kwamaphoyisa wumphakathi.
‘Iqiniso elimile wukuthi amaphoyisa ayawenza umsebenzi wawo, kodwa abantu abawenzela phansi wuphiko lwezokushushisa.
‘Umsebenzi wamaphoyisa wukubopha izaphulamthetho, kodwa futhi uma lezo zaphulamthetho sezibonakala zichanasa emigwaqeni kade zisanda kuboshwa, akumele kubukwe amaphoyisa.’
UMathenjwa ubuye wanxusa izakhiwo zomphakathi ukuba zisondelane nohlaka lwama-CPF, ngisho benezikhalazo ngamaphoyisa nangamacala adonsa undendende, basondele kwi-CPF.
‘Njengabantu abaxhumanisa umphakathi namaphoyisa sizowuqinisa umkhankaso wethu wokulwisana nobugebengu.
Concern over the rise in vehicle hijackings