Lelizwe lintula ubuholi obuqotho kwezepolitici- Shenge
UMHOLI we-IFP iNkosi Mangosuthu Buthelezi isinxuse amalungu eqembu lakhe ukuba aqhubeke nokwethemba ubuholi obuphethe uMasipala waseNkandla, ngoba buzifezile izidingo zabo ngobuqotho.
UShenge ukhulume kanjena ngesikhathi ehambele umbuthano wokubonga abavoti beqembu lakhe, obusenkundleni yezemidlalo yaseNkandla.
Ubulingani bokusebenzisana ngokwethembana buyisizathu sokuba i-IFP iqhubeke iphathe iNkandla. Kuyo yonke leminyaka silokhu sasisebenzisana nomphakathi, sizifezile izidingo zenu ngobuqotho, saninikeza umholi enimethembayo ozonimela.
‘Ngifuna ukunibonga. Niyinhliziyo eshaya ngaphakathi kwesifuba se-IFP. Niyisizathu sokuba sibe yizisebenzi zenu.
‘Ngaphandle nje kokuthi sithole ubuholi esingabathemba ukulawula ifa lombuso ngobuqotho nangokuhlakani, sizokwehluleka ukuphunyuka empini yomnotho ontengezelayo.
UShenge uthe kunesidingo sokuba bagudluzwe abaholi abehluleka ukuhola, labo abonakalisa umnotho wezwe ngezinqubomgomo ezinezinqumo ezimbi, nabasaphaza imali ngendlela engenabuhlakani.
‘Labo abazinothisa bona kube kuhlupheka izindimbane zabantu.
Luhlobo lwabaholi lolu oludinga ukubuyiselwa eceleni. Kungahle kungabi lula ukwenza lokho, kodwa kudingeka ukuba kwenzeke.’
UShenge ubabonge kakhulu abavoti baseNkandla ngokugcina lomasipala ngaphansi kwe-IFP.
‘Nyakenye ngemuva kwezinketho zohulumeni basekhaya, abezindaba bamemezela ukunqoba kwethu eNkandla njengento eyayibabazeka, ngenxa yokuthi sanqoba lapho kuzinze khona umholi kaKhongolose.
‘Bakwenza lokhu sengathi sasiqala ukunqoba eNkandla. Empeleni sasilokhu sikade silapha, ngaphambi kwezinketho zohulumeni basekhaya, sihola wona lomasipala.’
UShenge uchaze ukuhambela kwakhe eNkandla, njengokokuqala ngemuva kokuba lesi sifunda sesibizwa ngokhokho wakhe, ohlangothini lwasekhaya komama wakhe.
‘Kuthe lapho ngizwa ukuthi lesi sifunda kasisabizwa ngoThungulu, sesibizwa ngeNgonyama uCetshwayo kaMpande, ngakuthola lokhu kungehli kahle kimi.
‘Kodwa kwathi khona lapho ngakhumbula ukuthi konje leloqhawe leNgonyama yesizwe samaZulu elahlupheka kangaka lishushiselwa ukuvikela umbuso walo, nabantu balo okungokhokho bethu, ngaba nomuzwa wokuthi kwakufanele ukuba isifunda siqanjwe ngaso iSilo sasOndini.’ SA lacks leaders of integrity