Lemukelwe eleDumisani Makhaye Village
ZISISHAYELE ihlombe izakhamizi zaseDumisani Makhaye Village isenzo sikaMasipala waseMhlathuze sokugcina ebanikile lokho kuhlonishwa okufanele lendawo.
Lokhu kwenzeke ngesikhathi lomasipala ugxumeka ibhodi elisha elinombhalo walendawo osemthethweni.
Phakathi kwezakhamizi zakuleli lokishi eziluthakasele loluguquko kube ngabaholi bentsha bendawo, oSifundo Mnguni noMzamo Myeni.
UMnguni uthe lelibhodi libanika isibindi sokuthi nabo, sebehambela phezulu ngokuba yizakhamizi zaseDumisani Makhaye.
‘Bese siside isikhathi indawo yethu ibizwa ngamagama amaningi, amanye awo alumelayo nangenamlando ocacile ongasihlanganisa nawo njengomphakathi.
‘Kulendawo besibizwa njengabantu base-Dark City, abanye besebiza ngabantu bakwaDelunina kanye negama uMhlathuze Village, nalo ebeliyindida, njengoba ziningi izikhungo ezibizwa ngalo, kuhlanganisa nomasipala wakithi imbala.
‘Okunye okusijabulise kakhulu ukuthi lendawo iqanjwe ngalowo owaba uNgqongqoshe woMnyango Wezezindlu, nesishabasheki senkululeko uMnuz. Dumisani Makhaye, uShombela kaGabigabi.
Nguyena phela owahlaba isoyi ngemuva kokuba uMasipala uthenge lendawo komunye wabalimi, ukuze kuqalwe loluhlelo lwezindlu ngonyaka ka 2001.
‘Kukodwa osekusele ukuthi umasipala usisize ngakho uhlelo lokuthi kuqanjwe amagama emigwaqo, kuphinde kwandiswe namabhodi azosibeka ebalazweni, ukuze kube lula ukuthi uma izihlobo zethu, amaphoyisa nama Ambulensi noma abasidilivela izimpahla, besithole kalula uma befuna izindawo esihlala kuzona,’ kuqhuba uMnguni.
Ugcine ngelokubonga bonke ubuholi bukamasipala ukuba bushintshe izimpilo zabantu bakulendawo, ngokubenzela okuhle.
Ubuye waphonsela inselelo izakhamizi ukuba ziyiphathe kahle, ziphinde ziyihloniphe lendawo ukuze ibe ngenokuthula.
Okhulumela umasipala uMnuz. Mdu Ncalane uthembise lezi zakhamizi ukuthi ziningi izinhlelo abasazoqhamuka nazo njengomasipala ukuze kuhlomnule umphakathi, futhi bazobambisana nabo, kukho konke abasazokwenza.
Dumisani Makhaye Village welcomed