Bahlonyiswe ngolwazi lokuthuthukisa ibhizinisi
OSOMATEKISI badinga ukuhambisana nokushintsha kwezikhathi, uma besingethe amabhizinisi abo. Kumele ishintshe indlela abenza ngayo amabhizinisi.
IPhini likasiHlalo wenhlangano yamatekisi iSouth African National Taxi Council (Santaco) uMnuz. Zama Zincume uthe sekuyisikhathi soguquko embonini yamatekisi, kuyekwe ukudliwa ngoludala. UZincume ubekhuluma emhlanganweni wokuhlomisa ngolwazi osomatekisi bezinhlangano ezimbili, okuyi-A Rank ne-B Rank.
Lezinhlangano bekungokokuqala ukuthi zihlanganyele ndawonye emcimbini, emva kweminyaka engu-19 zingaboni ngaso linye.
Bebengamashumi amahlanu osomatekisi abebethamele lomhlangano, obubanjelwe eMpangeni Civic Centre.
Lomhlangano ubugxile kakhulu ekuhlomiseni osomatekisi ngokuphathwa kwamabhizinisi, ukukhuthaza indlela yokuxhumana namakhasimende kanye nokukhuthaza ukuthula noxolo nozinzo embonini.
‘Sinethuba lokushintsha indlela esicabanga ngayo nesenza ngayo izinto, sibeke phansi nezikhali, bese sigxila kulokho okungumsebenzi wethu, kokuthutha abagibeli.
‘Kuzodinga sibuye sishintshe ukuqalaza, sishintshe indlela esenza ngayo izinto. Kuyadingeka ukuthi sibuke ezinye izindlela zokungena emabhizinisi, ngaphandle nje kwamatekisi. Kungani singangeni embonini yamabhasi, emalolini ngisho kwezemikhumbi yasolwandle imbala? Obekhuluma egameni loMnyango Wezokuthutha esifundazweni, uMolly Sikhakhane ukhumbuze osomatekisi ngokubaluleka kokuvuselela izimvume zokusebenza kwabo.
Ubuye wanxusa osomatekisi ukuba benzele abashayeli babo izinhlelo zokubawashisa ezifanayo nalezi, ukuze nabo bangaphambani nendlela okuqhutshwa ngayo umsebenzi, nanombono wabanikazi bamatekisi nje. Workshop aims to equip taxi owners