ITHEMBA NGE-ONE STOP SHOP
UMENGAMELI Jacob Zuma uthi unethemba lokuthi ukuvulwa kwesikhungo esisha sezokuhweba kuzokwenza kube lula ukuthi abatshali zimali abanentshisekelo baqale amabhizinisi ngokushesha KwaZulu-Natal. Ukusho lokhu ngesikhathi kuvulwa ngokusemthethweni lesikhungo ngo Mgqibelo e-Inkosi Albert Luthuli Convention Centre eThekwini. Lokuvulwa nokuthathwa njengegxathu elibalulekile bekuhanjelwe iphini likaNgqongqoshe wezoHwebo nezeziMboni uBulelani Gratitude Magwanishe, uNdunankulu waKwaZulu-Natal uWillies Mchunu, uMphathiswa wezokuThuthukiswa kwezoMnotho noKongiwa kweMvelo uSihle Zikalala kanye neMeya yeTheku uZandile Gumede.
UZuma uthe lesikhungo siyingxenye yohlelo lukahulumeni lokunxenxa abatshali bezimali ukuthi baqale amabhizinisi. “Sibhekile ukuthi kungene amabhizinisi amasha kulesifundazwe kuthi abatshali zimali abakhona njengamanje bandise amabhizinisi abo ngoba lokho kuzodala amathuba emisebenzi okuyinto edingeka kakhulu kulesifundazwe nasezweni lonke,” kusho uZuma. Uqhube wathi uhulumeni uyakuqonda ukuthi abatshali zimali bavula amabhizinisi endaweni lapho kunozinzo khona. Ngaphandle komnyango wezohwebo loluhlelo lubandakanya iSouth African Revenue Services, abakwa-Home Affairs, umnyango wezabasebenzi , owezokongiwa kwemvelo kanye nezinye izinhlaka zikahulumeni nezombuso. Lokho kusho ukuthi uma kunenkampani enesi so sokuqala ibhizinisi izokwazi ukuthola lonke usizo ngokuvakashela lesikhungo esiseTrade and Investment KZN,eThekewini. Ngokusho kukaZuma osekusele ukuthi izinhlaka zonke zisebenzisane.
“Ukusebenzisana kwezinhlaka zikahulumeni kusuka kuhulumeni wasekhaya, owesifundazwe kanye nokazwelonke kubalulekile futhi kungaqinisekisa impumelelo yaloluhlelo,” kusho uZuma. Ngokusho kukaZikalala ukwethulwa kwaloluhlelo kusho ukuthi imidanti eminingi ethinta amabhizinisi isizophela nokuzokwenza iKZN ukuthi ibe yintandokazi kubatshali zimali nokuyoqinisekisa ukudalwa kwamathuba emisebenzi nokuthuthuka komnotho wesifundazwe.