Idlale ngokulingana futhi i-Richards Bay FC
NAMANJE i-Richards Bay FC isehluleka ukuvalela enethini amagoli, naphezu kwenqwaba yamathuba ewatholayo okushaya amagoli.
Nakulokhu iphindile futhi yaphoxa, ngesikhathi ibambana ngeqanda ngapha nangapha ne-Witbank Spurs, emdlalweni obuseMhlathuze Stadium, ngeSabatha.
Lomphumela uchaza ukuthi kumanje leliqembu le-NRB selidlale ngokulingana imidlalo eyisikhombisa, phezu kwemidlalo engu-11 asebeyidlalile kulesi sigaba se-NFD.
Omunye umdlalo okujwayele ukubonakala kuwo izinombolo ezifanayo ngumdlalo we-lotto kuphela.
Yize iphuzu elilodwa lingcono ukunokungatholi lutho, kodwa kusazoba umqansa ukuba leliqembu linyukele phezulu esicongweni se-log, njengoba liqoqa iphuzu ngalinye emidlalweni yalo.
Kuvele kwaba yilokhu osekujwayelekile, ukudlala ngamathuba okuvalela amagoli, kanti izivakashi nazo ziwatholile awazo amathuba okunqoba lomdlalo.
Abafana be-NRB yibona obekumele bazidlulele ngehubo laphaya, njengoba bedlale ngenqwaba yamathuba abebewathola.
Umqeqeshi omusha weqembu, u-Jean Luis Losciuto uphoqelekile ukubukela lomdlalo, nezihlwele, njengoba engakawatholi amaphepha amgunyaza ukusebenzela kulelizwe.
Yize egculisekile ngendlela abafana bakhe abadlale ngayo, kodwa kumkhalisile ukubona beyeka amathuba okushaya amagoli, obekuzobenza bahambe namaphuzu amathathu wonke.
Iqembu lasekhaya yilona ebeliwuthwele ngeqoma umdlalo, njengoba bekubhoke abadlali ababili uKhayelihle Shozi noKhulekani Madondo, abashaye amabhola amabi, kodwa azishayise kwabanye abadlali basemuva, kusaphele imizuzu engu-15 nje esiwombeni sokuqala.
Abafana be-NRB babe nebhadi nje, ngaphambi kokuyiwa ekhefini, ngesikhathi uPaseka Sekese, ephazanyiswa eselungiselela ukukhahlela ibhola.
Kubuye kwaba nesiphithiphithi, ngesikhathi abafana be-NRB bekhala ngephenathi obekumele bayithole, ngesikhathi ibhola ebelivalelwe nguSphelele Mkhulisi, libanjwa ngesandla emapalini e-Spurs, nalapho unozinti we-Spurs kade engasekho emapalini.
Amathuba afikile aze adlule ngesikhathi somdlalo, nalapho khona obese kubhoke oNjabulo Ngcobo, Thabiso Nkoana, Sekese, Philani Cele no-Michael Gumede, kodwa bonke bahluleka ukusebenzisa amathuba abawatholile.
Intukuthelo iyakhula kancane kubalandeli be-Richards Bay FC, njengoba imidlalo iqhubeka kodwa imiphumela ingagculisi.
Nokho ukubambisana kukaNkoana noSekese phambili, kubukeka kuzowathwalisa kanzima amaqembu amaningi, njengoba leliqembu selingenelwe ngamagoli angu-11, bona bashaya amagoli angu-8 nje kuphela.
Sesihlalele ethembeni lokuthi ukubakhona kuka-Losciuto kuzobakhuthaza kakhulu abafana be-NRB ukudlala ngokuzethemba, bashintshe nezinto. Richards Bay FC share the spoils once again