Isuse umsindo irenke yamatekisi aseMpangeni engakapheli
UKUBAMBEZELEKA kokwakhiwa kwerenke yamatekisi aseMpangeni, ku-Lot 63 sekudale ukukhathazeka kosomabhizinisi bendawo kanye nabemboni yezokuthutha.
Ngesikhathi iphephandaba lihambele kulendawo ebukeka iphithizela kuMaxwell Street, libingelelwe ngabashayeli bamatekisi, abebekhala ngokuthi uMasipala waseMhlathuzeubukeka wehluleka ukufeza izethembiso zawo.
Omunye wabashayeli bamatekisi uthi babenokujabula ngesikhathi kuqala loluhlelo lokulungiswa kwalerenke, kodwa manje asebezithola sebehluleka ukubekezelela isimo ababhekene naso.
‘Isiminyaminya esidalekayo kulendawo asikhathazi thina kuphela, kodwa sigcina sesikhathaza nabanye abashayeli bezimoto abasebenzisa lomgwaqo.
‘Sasithenjiswe ukuthi loluhlelo luzothatha izinyanga ezine ukuthi umsebenzi wonke uphele, kodwa kuze kube yimanje sekuphele cishe izinyanga eziyishumi nambili.
Asikho isikhulu sakwamasipala esesike sazohlangana nathi, sasibikela mayelana nokuthi loluhlelo selukusiphi isigaba, futhi luphela nini.
Lomgwaqo ongeminye ematasa kakhulu, kodwa ke ngomusa wenkosi azikabi khona izingozi ezimbi kakhulu,’ kuqhuba lomshayeli wetekisi okhathazekile.
Ukuvezile ukuthi bayawubonga umsebenzi owenziwe umasipala wokunweba irenke, iphinde ifakelwe nemipheme yokukhosela, kodwa okubakhalisayo isikhathi esasinqunyelwe lomsebenzi, esibukeka sesidlulile.
Omunye wabaphathi kulerenke, ukhale ngenselelo enkulu ababhekene nayo, yendawo yokupaka ngesikhathi besalindele ukulayisha abantu.
Lomphathi unxuse iphephandaba ukuba lifike kulendawo ngezikhathi zasekuseni nantambama, okuyizikhathi ezimatsa kakhulu, ukuze lizibonele ubunzima ababhekene nabo.
Uphinde wachaza nokuthi abanye babashayeli bezimoto ezize ezitolo, bazithola kulukhuni ukuthi zipake endaweni efanele, uma bezothenga. Uthe njengoba sekuyisikhathi samaholide kakhisimimusi, uzokwanda umthamo wezimoto ezizompintshana kulomgwaqo, njengoba kuzobe kukhona nezivakashi eziqhamuka kwezinye izindawo.Okhulumela umasipala uMnuz. Vincent Ncalane unxuse abamatekisi nabanye abahlukumezekile ngalesi simo ukuba behlise umoya, babekezele, njengoba amathunzi esewukela.
Outcry over taxi rank construction delays