Bakhala ngesimo somgwaqo abahlali baseMandlanzini
ZISALOKHU zikhale njalo izakhamuzi zaseMandlanzini ngesimo esingesihle somgwaqo.
UMnuz.Innocent Mthiyane oyisakhamuzi sakulendawo uthi lomgwaqo mubi ngendlela yokuthi awumuhle ngisho nakulabo abahamba ngezinyawo.
‘Lomgwaqo umigodigidi, futhi okubi kakhulu ukuthi kuthatha isikhathi eside ukuthola umshini wokuwulungisa,nokuyinto esibona ukuthi abaholi bethi abasiholayo abazinikele ngedlela eyanele ukulungisa lomgwaqo,’ kubeka uMnuz Mthiyane.
Uqhube wathi bayazi ukuthi uMasipala waseMhlathuze usezinhlelweni zokuwulungisa njengoba kuyimanje isigaba sokuqala sesisemaphethelweni.
‘Singathokoza uma kungangagxilwa endaweni eyodwa la kufakwa itiyela, kodwa kubuye kulungiswe nalapho sinenkinga khona kuze sizohamba ngokukhululeka,’ kubeka uMnuz. Mthiyane.
Nosomatekisi bendawo nabo bakhala ngezimoto zabo eziqedwa ilomgwaqo.
Bathi imali eningi abayenzayo bayithola isiphelela ekulungisweni izimoto zabo nokwenza bagcina sebefana nabantu abasiza umphakathi mahala ngaphandle kokuzuza.
Okunye okukhalisa abashayeli bezimoto kulendawo ukuba wuvanzi kwemfuyo enganakiwe, njengoba ibuye idale zingozi zomngwaqo.
Okhulumela umasipala waseMhlathuze uMnuz. Mduduzi Ncalane unxuse umphakathi ukuthi ubike ekhanseleni lendawo uma unezikhalo ngoba lona liyawazi umnyango lapho kutholakala khona usizo. Madlanzini community unhappy about poor roads