Likhuphukile izinga lemiphumela kamatikuletsheni kulonyaka
ZIKHUPHUKILE izibalo zokuphasa kwabafundi basezikoleni sasemakhaya ebebenza ibanga leshumi ngonyaka ofile.
Ukuzimisela kwalaba bafundi kukhombise ukuthi nakuba bengenazo izinsizakufunda ezanele kodwa ukusebenza ngokubambisana phakathi kothisha nabafundi kuletha izithelo ezincomekayo.
Omunye wabafundi ophumelele kahle,uNkosenhle Mthethwa,waseWelabasha High School, ngaphansi kukamasipala waseMfolozi, ubonge kakhulu othisha abazinikele nangezimpelasonto ukuzobafundisa ukuze bekwazi ukuqeda umsebenzi wonyaka kusenesikhathi nokubenze babe nesikhathji esanele sokubuyekeza izifundo zabo.
UNkosenhle uveze ukuthi phezu kwezimo ezinzima ebebefunda ngaphansi kwazo, njengokuhamba amabanga amade ngaphambi kokufinyelela ezikoleni kuhlangene nemifula ebigcwala kakhulu uma kunezimvula ezinkulu akubakhubazanga ezinhlosweni zabo zokuphumelela ezifundweni zabo.
OkaNyambose uthi kokunye abafundi bebebuye babhekane nengwadla yezimo zemindeni abavela kuyo.
‘Abanye bethu sebethembele kuhulumeni ukuthi baqhubeke nemfundo yabo emazingeni aphakeme ngoma imindeni yabo idonsa kanzima ngakwezezimali,’kubeka uMthethwa.
Uphethe ngokubonga kakhulu othisha babo abangasebenzeli ukuhola kuphela kodwa abanomgomo abazibekele wona wokwenza isiqinisekiso sokuthi ekupheleni konyaka kungabibikho umtwana noma abazali abazokhala ngabo uma sekuphuma imiphumela.
Omunye wothisha ofundisa endaweni yasemakhaya, ogama lakhe ligodliwe,ubonge kakhulu uhulumeni kanye nomnyango wezeMfundo ngokuthuthukisa ezinye zezikole sasemakhaya njengoba sezikhona ezifana ncimishi nezisemadolobheni ngokuba nezinsiza kusebenza ezenele nokwenza umsebenzi ungabinzima uma befundisa. Ugcine ngelokugqugquzela zonke izinhlaka ezifana nezigungu ezilawula izikole, othisha kanye nabazali kuze kuyofika phansi ebantwaneni ukuba zibambisane ngazo zonke izikhathi ukuze kuthi ekupheleni konyaka bakhiphe imiphumela emihle.Ophethe uMnyango wezeMfundo esiFundeni saseKing Cetshwayo, uMnuz. David Chonco uthe ezikoleni ezingu 93 abanazo ezisemakhaya izona ezisebenze kahle kakhulu ngokukhuphula izinga lokuphumelela kwabantwana ebebenza izinga leshumi.
‘Sibonga ukuzinikela kothisha kanye nabafundi kusukela kuqala unyaka kuze kube sekupheleni jnokuyinto eyenze kube nokuphumela kwabantwana abaningi esiFundeni sakithi,’kubeka uMnuz. Chonco
Rural Welabasha High School produces excellent results