Uxazulula izidubedube zaseShowe
UNGQONGQOSHE Wezokuthuthukiswa Komnotho, Ukuvakasha Nezemvelo, uMnuz. Sihle Zikalala usephinde wahlaba ikhwelo lokuba kwehliswe imimoya, kulandela udlame oluqubuke epulazini laseShowe.
Lezi zidubedube zenzeke ngemuva kokubulawa komuntu obezidobela ofishi epulazini i-Corby Hill ngoLwesibili ngesonto eledlule.
Ukuhambela kukaZikalala kulendawo kulandela udweshu oluqubuke kulelipulazi, laholela ekubulaweni kukaSphamandla Xulu, obeneminyaka engu-22.
Loludweshu luholele ekushisweni kwamapulazi amabili ase-Corby Hill Estates.
UZikalala uhlangane neziphathimandla ezehlukene ngaphambi kokuvakashela lamapulazi kanye nomndeni wakwaXulu, osendaweni yaseMlalazi, ngaphandle kwaseShowe, ngeSonto.
Emhlanganweni weziphathimandla, kuvunyelwene ngokuthi kusungulwe isigungu ezingeni likamasipala, esizobhekana nokuxazulula ukungqubuzana okungavela ngomuso.
Kubuye kwahlelwa nomunye umhlangano wamakhosi ngoLwesibili. UZikalala ugcizelele ukuthi loludweshu belungahlangene nezenzo zokuthathwa komhlaba ngesankahlu.
Unogada obhekene necala lokubulala uXulu, namanje usagcinwe esitokisini, kulandela ukuvela kwakhe enkantolo ngoLwesine. Uzophinde avele futhi phambi kwenkantolo kaMantshi waseShowe, ngoLwesine lomhlaka 22 March.
MEC intervenes in eShowe protests