Baxolisile kubagibeli abenkampani yamabhasi
ABENKAMPANI yamabhasi iPhathane Transport baxolisile kubagibeli ngesiteleka sabashayeli bakulenkampani, esishiye abasebenzi bengenazo izinto zokuhamba ngoMsombuluko.
Lokhu kuphazamise abasebenzi nabafundi, nokuyibona abasebenzisa kakhulu lamabhasi.
Okhulumela lenkampani uMnuz. Manqoba Mdletshe ubonge kubagibeli bonke, ngokubekezela kwabo, uma benezinkinga mayelana nabashayeli kuze kube ziyaxazululeka.
‘Siyakuqonda ukuthi sonke isizwe sakwaMthethwa sethembele kuthina, kwezokuthutha abagibeli. ‘Siphinde futhi sihambise nabaya emitholampilo nasemadolobheni ukuze bekwazi ukuthola izidingo zamakhaya, njengokujwayelekile.
‘Sinxusa abashayeli bethu ukuthi babambisane nathi, uma kunezinkinga baphinde futhi bahloniphe nomphakathi esiwusebenzelayo, ukuze uzizwe weneme ngomsebenzi wethu, esiwenzela wona.
‘Kumanje sisezinhlelweni zokuthi sikhuphule izinga lokusebenza emphakathini esiwuthuthayo, njengoba sesinohlobo olusha lwamabhasi esesilufakile.
‘Sibonga kakhulu ubuholi bomdabu kanye namaKhansela, ngokuthi asivumele ukuba sisebenze esizweni sakwaMthethwa, kuze kuphele lesosikhathi esinqunyelwe sona ukuthutha umphakathi.’
Uphinde wabonga nezikole ezakhele elakwaMthethwa, ngokuthi zisebenzise amabhasi enkampani yabo, noma bebuye babe nezinkinga kodwa bayababekezelela bangabadikili.
Bus company promises better service to KwaMthethwa community