Bakhala ngokunganakwa
UKHALA ngokushaywa indiva ezinhlelweni zentuthuko, umphakathi waseNhlabane, njengoba usalinde uMasipala waseMfolozi owabethembisa impilo engcono.
Esinye isakhamuzi sendawo uMnuz. Mvezeni Mbuyazi uthe sekuyabakhanyela ukuthi umasipala ubakhipha inyumbazana ezinhlelweni zentuthuko.
‘Yithi kuphela esisantula ingqalasizinda, efana nemigwaqo, amanzi kanye nogesi.
‘NeKhansela esalivotelayo asilazi ukuthi likuziphi izintaba, njengoba selokhu salibeka asikaze nhlobo silibone phambi kobuso bethu, noma siphambane nalo emgwaqeni.
‘Nomtholampilo esinawo awukho ezingeni, njengoba nesibalo sabasebenzi singenele, uma kuqhathaniswa nomthamo weziguli ezithutheleka kulomtholampilo.
‘Kwesinye isikhathi sizithola siphoqeleka ukuthi sihambe amabanga amade, ukuze sifinyelele lapho kunezinto ezingaba wusizo kuthina nemindeni yethu.
‘Okusiphatha kabi ukuthi iningi lezakhamizi esinazo kulendawo yethu, kuhlangene nentsha ayiqashwe ndawo.
‘Size sisizwe ngamahlathi esinawo, nanokuba siyakhuluma kuhlangene nemali yesibonelelo, ehambisana nempesheni yabadala,’ kuchaza uMbuyazi obebukeka ekhathazekile ngempilo abayiphila kulendawo.
‘Sesihlalele ethembeni lokuthi nathi liyoze line nangakithi, umasipala uyogcina ufikile, usizamele lokho oyosinika khona, ukuze nathi siyibone ngamehlo intuthuko. • Nhlabane community unhappy with slow pace of service delivery