Izohlomulisa intsha inkundla yezemidlalo eMawombe
KULINDELEKE ukuba intsha ihlomule ngenkundla yezemidlalo yaseMawombe, ngaphansi koMasipala waseMfolozi.
Lenkundla eyakhiwe ngezigidi zemali, kulindeleke ukuba maduzane njena ibe isiphothuliwe, yavulwa ukuze iqale ukusebenza.
Uhlelo lokwakhiwa kwayo luyingxenye yentuthuko uMasipala waseMfolozi oyidlulisela ebantwini.
Ekhuluma naleliphephandaba uSomlomo kaMasipala uKhansela Zakhele Mfusi, uthe babone kunesidingo sokusondezela intsha ingqalasizinda, ukuze ikwazi ukupheka amakhono ayo kwezemidlalo.
‘Kubalulekile ukuthi intsha uma isiqedile izikole, ingaveli nje ihlale emakhaya, kodwa kube khona imidlalo eyenzwayo ukuzigcina iphilile, futhi ibe nezinye izindlela zokuthuthukisa ngaphandle kwezemfundo.
‘Sifuna futhi nokuthuthukisa namakhono entsha, ukuze kusasa ikwazi ukuwasebenzisela ukuthi iziphilise iphinde iziqalele namathuba okuziphilisa.
‘Njengoba ubugebengu bungakaphumi esandleni kulendawo yethu, sibone kungcono ukuthi sisheshe siyiqoqe lentsha ingakabi wuvanzi, olungasalawuleki.
‘Nakwamanye amaWadi, sisaya ukuyobona ukuthi ikuphi okunye esingakwenza ukuthi sithuthukise intsha, ohlangothini oluthinta ezemidlalo’
Ugcine ngelokunxusa umphakathi ubambisane nabo ekutheni zonke izakhiwo abazakhela abantu, bazigcine ziphephile ukuze kuzothi nakusasa zisizakale.
Ongusihlalo wentsha phansi kwalomasipala uNksz. Sinikiwe Ngqulunga ubonge kakhulu ngokuthi nabo njengentsha bakhumbuleke ezintweni ezithinta intuthuko.
‘Singakujabulela ukuthi uma kunemicimbi emikhulu asisize, ngezinto zokuhamba ezizosisondeza kulenkundla, kwazise iseceleni lapho singenazo izinto zokuhamba ezanele ukuze sifinyelele khona.
Uphethe inkulumo yakhe ngokuthi agqugquzele intsha ukuba isungule izinto eziningi mayelana nezemidlalo, ngoba lomasipala ubukeka futhi uzethemba ekuthuthukiseni ezemidlalo.
• New sport field for Mawombe rural community