Ubeke isikole iMevamhlophe kwibalazwe
NAPHEZU kokwentula izinsiza kufunda, isikole samabanga aphezulu sasemakhaya iMevamhlophe High School sesingenile kwibalazwe lezikole zalelizwe.
Lokhu kungenxa yomfundi walesi sikole owenza i-Grade 11, uNokwanda Gumede. UGumede usanda kuwola inqwaba yemiklomelo emcintiswaneni obizwa nge-Financial Literacy Speech Competition, ngalokho waphakamisa ifulegi lalesi sikole esisendaweni yakwaMadlebe ngaphansi kwenkosi uZenzo Zungu.
Lomfundi obukeka eqaqekile ezifundweni zakhe, uqale ukuzidlela amahlanga kulomncintiswano esigabeni esiphansi, wedlulela esigabeni sesifunda, wagcina edlulele esigabeni sesifundazwe, nokuyilapho ephume khona isibili.
Ngokunqoba kwakhe kulomncintiswano uhambe nomklomelo kaR10 000, wazuzela isikole omunye umklomelo ka-R10 000, wazuzela uthisha obemcija ngomklomelo ka-R1 000, wase ehlabana nge tablet kanokusho.
Bekungokokuqala ukuba lesi sikole singenele lomncintiswano obusuwenziwa iminyaka engamashumi amabili.
Lomfundi oneminyaka engu-16, manje usezomela isifundazwe kulomncintiswano esigabeni sikazwelonke, esizobanjelwa eGoli, ngomhlaka 11 October. Kulomncintiswano uGumede ubethula inkulumo yemizuzu emihlanu ngaphansi kwesihloko esithi ‘Ungaliqala kanjani ibhizinisi’?
Lomncintiswano uxhaswe yisikhungo i-Financial Sector Conduct Authority, Financial Services Consumer Education Foundation, Financial Planning Insititute of Southern Africa, uMnyango Wezemfundo KwaZulu-Natal kanye neKZN Financial Literacy Association.
Echaza ngalempumelelo yomfundi wake uthisha wesikole, uMnuz. Nhlakanipho Jangaza uthe lomfundi akacinanga nje kuphela ngokuphakamisela phezulu ifulegi lesikole, kodwa ubeke nesifunda sase-King Cetshwayo kwibalazwe.
‘Siyajabula ukuthi isikole sethu siyavelela emphakathini ngezinto ezinhle, futhi uNokwanda uzobendiza ngebhanoyi okokuqala elibangise kwaNyamakayipheli.
‘Lesi sikole sathola izinga lika96% kwimiphumela kamatikuletsheni ngonyaka odlule, kanti kulonyaka sihlose ukufika kwizinga lika-100%.’
IPhini likathishanhloko wesikole uMnuz. Mjabuliseni Ngubane uthe impumelelo kaGumede izokwenza bonke abantu baqale basibuke ngamanye amehlo manje isikole sakhe.
• Mevamhlophe High School scores big in speech competition