Twee mans in hof vir mensehandel en seksdade met tiener
Die borgtogaansoek van twee mans van George wat van verkragting, mensehandel en poging tot seksuele aanranding van 'n minderjarige meisie verdink word, het gister (Woensdag 26 Julie) in die Georgelanddroshof begin.
Die verdagtes, onderskeidelik 37 en 66 jaar oud, is in Junie deur lede van die gesinsgeweld, kinderbeskerming en seksuele misdrywe-eenheid (GKS) in hegtenis geneem nadat ‘n tienermeisie (15) van Blanco ‘n klag by die polisie ingedien het.
Die 37-jarige verdagte word van verkragting en mensehandel aangekla en is Maandag 26 Junie by sy ouers se huis in Blanco aangekeer. Die verdagte, met 'n reeks vorige veroordelings waaronder poging tot verkragting en ernstige aanranding, het self in die getuiebank ingeskuif om in sy borgtogaansoek te getuig. Hy wou nie oor die meriete van die saak praat nie. Hy het getuig dat hy op borgtog vrygelaat moet word omdat hy moet werk om 'n inkomste te verdien. Hy sê hy het twee kinders wat hy onderhou en dra ook finansieel by tot sy ouers se huishouding. Volgens hom woon hy gedurende die week by hulle omdat dit naby sy werkplek is en oor naweke gaan hy in Thembalethu by sy oom tuis. Die 66-jarige verdagte, 'n bekende plaaslike sakeman, word van mensehandel en poging tot seksuele aanranding aangekla. Hy is die volgende dag op sy plaas in Geelhoutboom in hegtenis geneem.
Sy huis op die plaas is ook deursoek nadat die polisie ‘n lasbrief bekom het. Die polisie het op selfone, hardeskywe en pornografiese materiaal beslag gelê. Die selfoon van die 37-jarige is ook gekonfiskeer en sal saam met die ander verdagte se foon vir ontleding weggestuur word. Die staat voer aan dat die 37-jarige verdagte die slagoffer uit Golden Valley gelok en haar omgepraat het om pornografiese foto's van haar te neem. Hy het na bewering ook 'n pornografiese video van die meisie gemaak waarna hy haar verkrag het. Die 66-jarige verdagte het weens 'n gebrek aan tyd nie voorgekom nie. Beide mans se borgtogaansoek sal op 7 Augustus voortgesit word.