Niks nuut oor spoed in Knysnaweg
Na 'n brief van 'n bekommerde leser aan die George Herald, is daar weer navraag gedoen oor die vordering in gesprekke tussen die George-munisipaliteit en provinsiale verkeer rakende die spoedgrens in Knysnaweg en of daar 'n spoedkamera op dié stuk pad tussen die dorp en die Garden Route Mall oorweeg word. Dit volg ná die gru-ongeluk in Junie hierdie jaar waarin Caroline van der Merwe (21) op die betrokke pad gesterf het. Twee bestuurders het na bewering in haar motor vasgejaag terwyl hulle glo resies gejaag het. Caroline se ma, Susan, voel steeds dat die renjaers verantwoordelik gehou moet word vir haar dood.
In 'n gesamentlike poging deur Mujo's Restaurant en die Van der Merwe-gesin is 'n petisie begin waar hulle die munisipaliteit en die Wes-Kaapse departement van vervoer vra om permanente spoedkameras in Knysnaweg aan te bring en dat 'n oplossing vir die onwettige laatnagresies op dié stuk pad gevind word. "Ons het intussen die petisie gesluit, want daar was reeds meer as 18 500 handtekeninge. Dit is meer as genoeg vir hulle om op te tree," het sy vandeesweek aan die George Herald gesê. "Dit gaan maar op en af met ons. Soms is ek oukei, maar ander kere stap ek in die kombuis in, sien haar foto en besef dat ek haar nooit weer gaan sien nie. Ons kon nie eers groet nie."
Volgens Chantel EdwardsKlose, die munisipale woordvoerder, is gesprekke tussen George-munisipaliteit en provinsie rakende Knysnaweg aan die gang. "George-verkeersdepartement kan geen veranderings op die betrokke pad aanbring sonder die goedkeuring van provinsie nie." Sy sê die plaaslike verkeersdepartement het intussen die sigbaarheid op die pad verhoog en die moontlikheid van 'n 24 uur skoftestelsel word ondersoek.
Levin Muller, een van die passasiers in Caroline se motor tydens die ongeluk, het erge beserings aan sy linkerhand opgedoen en was onlangs vir 'n tweede operasie aan dié hand. Sy pa, Vincentius, het aan die George Herald genoem dat Levin geestelik baie positief is en hulle hoop vir volkome herstel van sy hand.
"Alhoewel die skade aan sy hand erger is as wat vroeër vermoed is, is daar is 'n definitiewe kans dat sy hand 100% kan herstel. Dit is egter nog te vroeg vir die dokters om dit te waarborg. Hy kan sy pinkie, duim en wysvinger effens beweeg, maar nie die ander twee vingers nie. Hy sien tans 'n arbeids- en fisioterapeut vir traumabehandeling en rehabilitasie." Levin het intussen teruggekeer universiteit toe, maar daar word nog besluit of hy die tweede semester gaan bywoon of nie. "Die rehabilitasie van sy hand kan nog 'n redelike tyd neem, en hy ervaar nog baie pyn," sê sy pa.
Ons het intussen die petisie gesluit, want daar was reeds meer as 18 500 handtekeninge.