Jong man hang homself in selle

'n Jong verhoorafwagtende se vrese om terug te keer na die tronk, blyk die rede te wees vir sy selfdood.

Die liggaam van die jong man (20) is Dinsdag 24 Julie omstreeks 14:45 in die hofselle by die George-landdroshof gevind. Die oorledene, wat van die Mosselbaaijeugsentrum gekom het, het vermoedelik selfdood gepleeg deur homself met kledingstukke te hang.

Volgens kapt. Malcolm Pojie, die SuidKaapse polisiewoordvoerder, het die oorledene aan die tralies gehang met ‘n kledingstuk om sy nek. Hy het vroeër die dag in die hof op aanklag van diefstal verskyn waar sy saak uitgestel is. Hy sou later die middag na die Mosselbaaijeugsentrum terugkeer. Volgens 'n bron wou die oorledene nie terugkeer na Mosselbaai nie en het hy blykbaar stukke van sy broek geskeur en gebruik om sy eie lewe te neem.

Die oorledene was alleen in sy sel en geen misdaad word vermoed nie. 'n Geregtelike doodsondersoek word gedoen.

Verhoorafwagtendes se veiligheid is die verantwoordelikheid van die polisie, dus is die voorval aan die onafhanklike polisieondersoek direktoraat (Opod) gerapporteer.

Die polisie kon teen druktyd nie die naam van die oorledene bevestig of sê van waar hy is nie.

* A young awaiting-trial prisoner took his own life on Monday 24 July when he hung himself with his clothes in the holding cells at the George Magistrate's Court. He was in custody on a theft charge and had appeared in court earlier that day. According to a source the young man did not want to go back to the Mossel Bay Youth Correctional Centre where he was detained. Police have opened an inquest docket and the matter has been reported to the Independent Police Investigative Directorate (Ipid).