‘Te min polisie in Pacaltsdorp’
Daar is nét nie genoeg polisie in Pacaltsdorp nie. Só sê Joanie Visagie-Jantjies, 'n gemeenskapswerker van die area nadat sy, met behulp van 'n onbekende jong man, die verkeer moes reguleer na 'n ongeluk verlede Saterdag 22 Julie omstreeks 17:30 in Missionstraat. Volgens Visagie-Jantjies het 'n wit VW Jetta en 'n maroen Opel Astra naby die Pacaltsdorp-poskantoor gebots. Sy sê die bestuurder van die Jetta het beheer oor sy voertuig verloor, in die teenoorgestelde baan beland en met die Astra gebots.
Visagie-Jantjies het aan die George Herald vertel dat die bestuurder van die Jetta dronk was en van die toneel gevlug het. "Hy het probeer weghardloop, maar hy was te dronk. Die bestuurder van die Astra en nog 'n man het hom agternagesit en hom gevang voor die polisie op die toneel aangekom het."
"Ons moes 'n halfuur of selfs langer vir die polisie wag, dis onaanvaarbaar. Hier was 'n polisievoertuig, maar hulle het gery en gesê hulle gaan iemand anders stuur. Dis mos swak vir enige polisiebeampte om van 'n ongelukstoneel af weg te ry. Hier is net vier voertuie wat die hele Pacaltsdorp moet bedien. Dit is heeltemal te min vir alles wat hier aangaan en die hoeveelheid mense wat hier woon," het sy ontstoke gesê.
Sy sê verkeersbeamptes was eerste op die toneel en was baie knap, maar het slegs drie verkeerskegels byderhand gehad. "Toe die Pacaltsdorp-polisie daar aankom het ek vir nog cones gevra wat hulle toe van die stasie af laat kom het."
Kapt. Lorraine Coetzee, kommunikasiebeampte van Pacaltsdorppolisie, het bevestig dat hulle Saterdag om 19:00 na 'n ongeluk in Missionstraat uitgeroep is. Met hulle aankoms op die toneel het hulle twee voertuie aangetref wat volgens haar vermoedelik in 'n ongeluk betrokke was. Die bloed-alkoholvlakke van albei bestuurders is getoets en 'n 39-jarige verdagte is in hegtenis geneem vir dronkbestuur en roekelose bestuur.
Op die vraag oor hoekom die polisie so lank gevat het om die ongelukstoneel te bereik, het sy geantwoord: "Die voertuig was ook besig met ander klagtes waaraan hulle dringend moes aandag gee voor hulle na die ongelukstoneel kon gaan. Met hulle aankoms was verkeerspersoneel reeds op die toneel.
Op hierdie stadium is dit moeilik om vas te stel wie die lede is wat weggery het, want daar is geen spesifieke beskrywing of registrasienommer van die polisievoertuig aangemeld nie," het sy aan die George Herald gesê. Albei voertuie is van die toneel af weggesleep en niemand is beseer nie.
Ons moes ‘n halfuur of selfs langer vir die polisie wag, dis onaanvaarbaar.