Knysna-byebedryf kry geldinspuiting
Byeboere in die Knysna/Plettenbergbaaiomgewing doen alles in hul vermoë om die byebedryf, wat in in Junie vanjaar deur wydverspreide brande vernietig is, weer op dreef te kry.
Meer as 300 korwe met swerms en ‘n onbekende aantal wilde bye in ‘n gebied van sowat 80 km x 20 km is in die brande vernietig.
“Min bye-aktiwiteit word na die brand in die gebied opgemerk,” sê Owen Williams van Honeychild-byeboerdery by Rheenendal, en voorsitter van die Knysna Byeboerorganisasie (KBA).
'n Organisasie sonder ‘n winsoogmerk, Hope for the Honeybees, is tot stand gebring om skenkings vir die byebedryf te bestuur. Williams, Meagan Vermaas en Grant Liversay, almal van Honeychild, dien op die bestuur van die organisasie. ‘n Ouditeur is aangestel om rekord te hou van die aanwending van skenkings. “Die proses moet deursigtig wees om vertroue in te boesem by toekomstige skenkers.”
Skenkings
Tot op hede is R250 000 van Gift of the Givers ontvang, wat ook R50 000 se suiker geskenk het. Nog skenkings van meer as
R50 000 is ontvang, maar die skenkers wil anoniem bly. Daar is ook korwe geskenk. Brendan Ashleigh-Cooper, byeboer van Stellenbosch het 40 gesteriliseerde korwe geskenk. Guy MacGladdery van Pietermaritzburg het 100 korwe geskenk. Die korwe word tans vervaardig en sal gratis deur Gift of the Givers na Knysna vervoer word.
Volgens Williams skep die ruimhartige skenking van organisasies soos Gift of the Givers en ander ‘n “kultuur van gee, nie net van geld of tasbare goed nie, maar ook van omgee. Medemenslikheid laat mense uitstyg bo enige uitdaging.”
“Hope for the Honeybees het ‘n skrynwerker aangestel wat die korwe aanmekaar gaan sit,” sê Williams, wat self al jare lank korwe aanmekaarsit.
‘n Skrynwerkers-assistent sal ook aangestel word wat met Williams se leiding, die korwe met was sal behandel om dit weerbestand te maak. Die volgende besending korwe sal by MacGladdery bestel word. “Dit is net gepas.”
Registreer
Byeboere wat gratis korwe en voeding wil ontvang moet by die departement van landbou, bosbou en visserye te registreer, soos wat deur die wet vereis word. Hulle word ook aangemoedig om vir die eerste jaar gratis by die Knysna Byeboer-organisasie te registreer. Ledegeld beloop normaalweg R100/jaar. Die nodige registrasiedokumente is by die sleutelpunte beskikbaar.
Byeboere word versoek om per e-pos met die hulpverleningsaksie kontak te maak by aidforthehoneybee@gmail.com of op Facebook by Hope for the Honeybees met die vereniging kontak te maak.