Verbetering ‘n jaar na betoging
Een jaar nadat pasiënte van Parkdenekliniek betoog het, vind pasiëntwaarnemings nou in privaatheid plaas en is daar ook sekerheidswagte op die perseel.
Op Dinsdag 21 June 2016, het minstens 60 mense, buite die kliniek, aan ‘n betoging oor privaatheid en veiligheid deelgeneem. Die inwoners het hul bekommernisse uitgespreek oor hul privaatheid wat beperk is tydens pasiëntondersoeke en die gereelde inbrake by die nuutgeboude afdeling van die kliniek.
Op daardie stadium het die departement van gesondheid se woordvoerder, Nadia Ferreira, gesê: “Wanneer die nasionale departement van openbare werke die nuutgeboude afdeling aan die departement van gesondheid oorhandig, sal addisionele maatreëls in plek wees om veiligheid en privaatheid te verbeter.”
Onlangs het Ferreira aan die George Herald gesê die nuutgeboude afdeling is vroeër vanjaar aan die gesondheidsdepartement oorhandig. “Die konsultasiekamers is in gebruik. Privaatheidskwessies was te wyte aan ruimte-uitdagings, maar dit is opgelos deur die vyf addisionele konsultasiekamers. Daar is ook sekerheidswagte 24 uur op die perseel en sluit ook gewapende reaksie in,” sê Ferreira.
‘n Pasiënt wat die kliniek gereeld vir behandeling vir hoë bloeddruk besoek, sê hy is tevrede met die verbetering aan die kliniek: “Ek was skaam om voorheen my waarnemings te laat doen waar ek sigbaar was vir ander mense, maar konsultasiekamers bied nou privaatheid.”
Die operasionele bestuurder van die kliniek, Nodumo Dangazele, het gewys waar die pasiëntwaarnemings voorheen gedoen is, en ook trots gewys na die vyf konsultasiekamers. “Die privaatheidkwessie het geweldig verbeter.”