Restaurant teater ’n eerste vir KKK
Klassieke musiekliefhebbers kan vanjaar vir die eerste keer ’n restaurant teaterervaring by Klein Karoo Klassique op Oudtshoorn beleef. Dié winterfees van klassieke musiek, kuns, kos en wyn, word van Vrydag 11 tot Sondag 13 Augustus vir die negende keer aangebied.
By Die Windpomp Restaurant Teater, geleë in die CJV-saal agter die NG Moederkerk, kan feesgangers twee musiekuitvoerings en smulkos, berei deur die span van Signature Divine ervaar.
"Vrydagaand kan feesgangers uitsien na An Evening of Jazz met van die finaliste uit hierdie jaar se Artscape Youth Jazzmentorskapprogram.
Op die program is beide Suid-Afrikaanse en klassieke jazz," sê Rhodé Snyman, uitvoerende hoof van Kunste Onbeperk, die maatskappy wat Klein Karoo Klassique aanbied.
Topmusici wat as mentors vir die jong kunstenaars opgetree het, sluit in Amanda Tiffin, Camillo Lombard, Shaun Johannes, Frank Paco en Marc de Kock.
Sulayman
Plaaslike pianis Sulayman Human, keer Saterdagaand terug na sy tuisdorp vir ’n Aand met Sulayman Human. "Hierdie optrede is ’n moet vir liefhebbers van klaviermusiek. Sulayman speel Mozart se Sonate in C majeur, KV330, Chopin se Berceuse in D-mol majeur Op.57, asook musiek van Schubert, Rachmaninoff en Kapustin," vertel Snyman.
Aandetes word in Die Windpomp Restaurant Teater vanaf 19:00 bedien en feesgangers kan smulgeregte, met bestanddele uit die Klein Karoo en omgewing verwag.
Die musiekoptredes begin om 21:00 en kaartjies hiervoor sluit nie aandete in nie. Kaartjies vir optredes in Die Windpomp Restaurant Teater is beskikbaar by Kunste Onbeperk se kantoor of 044 203 8600. Etes word by die restaurant bespreek en betaal.
Musiekuitvoerings
Die agt musiekuitvoerings op Klein Karoo Klassique se musiekprogram, sluit in CH2 in konsert met Corneille Hutten en Dirkie van Staden (kitaar), Vivaldi se Vier Seisoene herbesoek met Petrus de Beer (viool), Stanislav Angelov (trekklavier) en Schalk Joubert (baskitaar en voordrag), Folk Baroque met die Camerata Tinta Barocca, Alleenstryd: Hendrik Hofmeyr Huldigingskonsert met Minette du Toit-Pearce (mezzo-sopraan), Lauren Dasappa (sopraan), Jolene
McCleland (mezzo-sopraan),
Geniet smulkos en klassieke musiek in Die Windpomp Restaurant Teater
José Dias (klavier) en ’n gasoptrede deur Hendrik Hofmeyr.
Carmen in die Kleine
Carmen - in die kleine met Jolenne McCleland as Carmen (mezzo-sopraan), Lauren Dasappa as Michaëla / Frascuita (sopraan), Linette van der Merwe as Mercédès (mezzo-sopraan), Chris Mostert as Don José / Le Remendado (tenoor), Niël Rademan as Escamillo (bariton) en Raimondo van Staden as Le Dancaïre (bariton); Spieël-dans in die maanlig met Jana van der Walt (harp) en Rina Schutte (tjello); Beethoven Tango met Zanta Hofmeyr (viool) en Charl du Plessis (klavier).
Afsluitkonsert
Die ATKV Afsluitingskonsert met Megan-Geoffrey Prins (klavier), Tatiana Thaele (fluit), Palesa Malieloa (sopraan) en Philippus Hugo (klavier) is een van die hoogtepunte vanjaar.
Kaartjies vir dié musiekuitvoerings is beskikbaar by Computicket, Shoprite/ Checkers en House & Home teen R125 elk. Al vanjaar se uitvoerings word in die NG Moederkerk aangebied, waar daar ook ’n CD-winkel bedryf word.