Rosedale pa kry 10 jaar vir moord
Die pa van Rosedale, wat in Mei verlede jaar sy tienerseun se vermeende rower doodgeslaan het, is in die George-streekhof aan moord skuldig bevind.
Samuel Meyer (44) en sy medepligtige, Gerald Arnold (29), het vandeesweek reeds die eerste maand van hul 10 jaar vonnis uitgedien nadat hulle op 4 Augustus vir die moord op Winston Jacobs (31) op 17 Mei 2016 gestraf is. Jacobs is die betrokke dag ernstig aangerand nadat hy daarvan verdink is dat hy Meyer se seun (toe 14 jaar) vroeër die oggend van sy tablet beroof en hom met ‘n mes gesteek het.
Die seun was op pad skool toe, toe hy na bewering deur Jacobs langs die N2-snelweg voorgekeer is. Die seun is tydens die rooftog in die linkerskouer gesteek.
Met die polisie se aankoms op die toneel is Jacobs bewusteloos in die pad aangetref en in ‘n kritieke toestand na die George-hospitaal geneem waar hy later die aand gesterf het. Beide mans is sedert hul arrestasie kort na die voorval in aanhouding. Hulle is op 4 Augustus gevonnis. Pogings deur die George Herald om met die Meyer-familie kontak te maak, was onsuksesvol.
Eric du Preez (44) van Pacaltsdorp is ook onlangs in die George-streekhof 15 tronkstraf opgelê vir die moord op sy vriendin, Phillipina Hendricks (44). Hendricks se liggaam is op 29 Januarie 2013 onder ‘n vyeboom in Noordstraat gevind nadat sy ‘n paar dae vermis was. Sy het veelvuldige beserings gehad.
Beide sake het gedien voor streeklanddros Praglapa Govender en Aletta Stanvliet het aangekla. Adjudant-offisier Vernon Jantjies van die Pacaltsdorp-speurdiens het die moorde ondersoek.
* A Rosedale father who had beaten a man to death after the man allegedly robbed and stabbed his son in May last year, was found guilty of murder and sentenced to 10 years imprisonment. Samuel Meyer (44) and his accomplice, Gerald Arnold (29), were convicted of the murder of Winston Jacobs (31), also from Rosedale. Meyer’s teenage son (14) was allegedly robbed by Jacobs on 17 May 2016 next to the N2 highway while on his way to school. The teenager was robbed of his tablet and stabbed in his left shoulder.