Onduidelikheid oor borgvoorwaardes
“Daai man loop lekker in Blanco rond. Hy het vir die hof gelieg; hy het nie ander blyplek in Themabalethu nie.” Só het ‘n betroubare bron verlede Vrydag aan die George Herald vertel nadat ‘n 37-jarige man, wat van seksmisdade met ‘n minderjarige verdink word, kort ná sy vrylating op borg in Blanco opgemerk is. Sou dit waar wees, is dié optrede teenstrydig met sy borgtogvoorwaardes.
Hy is een van twee beskuldigdes wat onderskeidelik van verkragting, mensehandel en poging tot seksuele aanranding van ‘n minderjarige meisie verdink word.
Volgens sy borgvoorwaardes, wat verlede Donderdag deur landdros Phillip
Mgwebile in die Georgelanddroshof voorgelees is, mag die beskuldigde Blanco slegs binnekom mits dit vir werkdoeleindes is.
Die George Herald het intussen betroubaar verneem dat die verdagte tans nie by ‘n maatskappy in Blanco, soos hy aan die hof gesê het, in diens is nie.
Ná die George Herald verlede Vrydag inligting ontvang het dat die beskuldige in Blanco gesien is, is die polisie geskakel. Die ondersoekbeampte was uitstedig en dit blyk min is in daardie stadium aan die situasie gedoen.
‘n Familielid van die slagoffer het ook Vrydag die polisie geskakel nadat die beskuldigde in die area naby die slagoffer se huis gesien is. “Daar is vir ons gesê hulle sal Maandag verklarings kom neem,” het die familielid gesê.
Volgens ‘n bron is die beskuldigde na bewering Saterdagaand ook by ‘n dans in Blanco gesien waar hy met jong meisies gesels het.
By navraag Maandag is gevind dat daar onduidelikheid bestaan aangaande die beskuldigde se borgvoorwaardes. Kapt. Malcolm Pojie, Suid-Kaapse polisiewoordvoerder, het aanvanklik aan die George Herald gesê volgens sy kennis is die verdagte borgtog van R1 000 toegestaan op voorwaarde dat hy geen direkte of indirekte kontak met die slagoffer of getuies mag hê nie.
Die George Herald, wat die saak bygewoon het, het notas wat tydens die hofgebeure gemaak is, deurgegaan en die voorwaardes wat in die hof gelees is, bevestig.
Die beskuldigde is R2 000 borg opgelê en mag onder geen omstandighede met die slagoffer of getuies kontak maak nie. Hy mag Blanco geensins betree buiten vir werkdoeleindes nie. Hy moet by die alternatiewe adres in Thembalethu, wat hy aan die hof verskaf het, woon en moet elke Maandag, Woensdag en Vrydag tussen 06:00 en 21:00 by dié polisiestasie aanmeld.
Die polisie het
Dinsdagoggend dieselfde borgvoorwaardes bevestig.
“Ons dra kennis van die bewering dat die beskuldigde in Blanco gesien is. Indien daar bewys kan word dat hy sy borgvoorwaardes oortree het, bestaan die moontlikheid dat ‘n lasbrief vir sy inhegtenisname uitgereik sal word,” het Pojie Dinsdag gesê. “Daar is prosesse wat gevolg moet word in so ‘n situasie.”
Die ander beskuldigde, ‘n bekende plaaseienaar van die Blanco-omgewing, is R5 000 borg opgelê.
Volgens sy borgvoorwaardes mag hy onder geen omstandighede met die slagoffer of getuies in verbinding tree nie en mag hy geensins ‘n selfoon gebruik nie. Indien hy oproepe wil maak, moet dit deur ‘n landlyn gedoen word. Die saak is uitgestel tot 6 Oktober vir verdere ondersoek.