Tuiniqua se personeel sit inwoners ore aan
As deel van hul lentedagvieringe en om die goeie gees tussen die oordpersoneel en inwoners te bevestig, het Tuiniquaversorgingsoord die middag van 1 September gebruik om 'n rolbalwedstryd tussen die inwoners en personeel te hou.
Omdat die oord se gereelde rolbalspelers die baan te goed ken, is besluit dat slegs diegene wat nog nie vantevore rolbal gespeel het nie, vir die inwonerspan mag deelneem. Dit was duidelik 'n fout, want onder groot aanmoediging en toejuiging deur medepersoneel (en baie inwoners) het die personeelspan die inwonerspan behoorlik ore aangesit. Ter versagting blyk dit dat daar tussen die personeel wel gesoute rolbalspelers was.
Heerlike boerewors is ook gebraai en worsrolletjies te koop aangebied. So smulsmul het die uitslag toe ook uiteindelik nie saak gemaak nie, want die goeie gees wat geheers het, het die band tussen personeel en inwoners net hegter gemaak. Blykbaar gaan die inwoners volgende keer 'n paar maande vroeër begin oefen om darem meer mededingend te wees.