Boetes: Geen voorsiening vir sekuriteitsvoertuie
Die brief deur Deon Gericke van George oor "Verkeersboetes wat gewapende reaksieoffisiere self moet betaal", George Herald 4 September, het betrekking.
Trevor Botha, munisipale bestuurder George:
Sekuriteitsfirmas speel ‘n belangrike rol in die gemeenskap en ons sou hulle graag wou tegemoetkom, maar die Nasionale Padverkeerswet maak ongelukkig nie voorsiening vir sekuriteitsvoertuie nie, en daarom moet boetes vir spoed- en parkeeroortredings uitgereik word.
Volgens Artikel 60 van die Nasionale Padverkeerswet, Wet 93 van 1996, mag slegs bestuurders van brandbestrydingsvoertuie, brandbestrydingsreaksievoertuie, reddingsvoertuie, nood-mediese reaksievoertuie, ambulanse, verkeersvoertuie en polisievoertuie snelheidsgrense in die uitvoering van hul pligte oorskry.
Munisipale verordeninge kan nie landswette weerspreek nie, dus moet die munisipaliteit die wet toepas, al sou die munisipaliteit anders omtrent die saak voel.
Die staatsaanklaer vir die munisipale hof kan egter, indien daar geldige redes vir die oortreding is, dit oorweeg om die bedrag van die boete te verlaag. Ons moedig sekuriteitsbesighede aan om vertoë te rig wanneer hulle boetes ontvang. Indien genoegsame bewys gelewer kan word dat die sekuriteitsvoertuig op ‘n noodgeval gereageer het, sal die aanklaer die omstandighede in ag neem en moontlik tot ‘n laer boete instem.
Ons wys egter uit dat dit nie ‘n oorhoofse goedkeuring vir alle jaery deur gemerkte privaat sekuriteitsvoertuie is nie, dat die bestuurders werksaam by ‘n geregistreerde sekuriteitsmaatskappy moet wees, en dat elke geval individueel en op meriete gehanteer sal word om misbruik van hierdie oorweging te vermy.