Progress begin veldtog teen Tygerberg
Duisende ondersteuners oor die hele Wes-Kaap word Saterdagmiddag op die Rosemoor-sportterrein verwag wanneer Progress Saru se Goue Bekerrugbykompetisie teen die gedugte span van Tygerberg afskop.
Progress speel in Groep B saam met Old Selbornians van die Grens, Progress van die Oostelike Provinsie, Swallows van die Grens en Tygerberg.
Tygerberg het Sondagmiddag op Florida Park in Kaapstad ‘n vroeë waarskuwing aan die ander spanne in die kompetisie gestuur toe hy die klubkampioen van die OP, Progress, oortuigend met 54-27 geklop het.
Vincent Moos, hoofafrigter van Progress (George), het aan die George Herald gesê: “2017 was die jaar waarin die gemeenskap, spanbestuur en spelers soos een man saamgestaan het en alles ingesit het om van hierdie seisoen ‘n sukses te maak. Die idee het reeds in 2016 posgevat toe die span aan ‘n toernooi in die Oos-Kaap deelgeneem en deur ‘n groot getal ondersteuners aangespoor is om ‘n oorwinning te behaal.
“Na die geweldige onderskraging vir die span tydens die Premierliga-eindstryd, besef ons terdeë die groot waarde wat die gemeenskap heg aan hul span se deelname aan die Goue Beker-kompetisie.
“In 19 wedstryde in die Premierligakompetisie was daar nie enige onsmaaklike insident nie. Almal verdien ‘n woord van waardering vir hul onberispelike gedrag.
“Rugby en die sukses van die span het die gemeenskap saamgesnoer en ‘n positiewe gesindheid te weeg gebring. Hierdie jaar is die spelers as rolmodelle in hul gemeenskap gesien en het hulle hul daarop toegespits om veranderinge in die gemeenskap mee te bring onder die slagspreuk ‘Progress vir Christus’ om die goeie nuus uit te dra na ‘n beter omgewing.
“Progress verteenwoordig nie net die Rosemoor-omgewing nie, maar die hele SWD.
“Ons wil die SWD se uitvoerende gesag, George-munisipaliteit en al ons ondersteuners bedank vir hul geloof in ons.”
Progress sal Clinton Wagman (regtervleuel), wat na die finaal na Skotland verhuis het, baie mis. Dié voormalige Arend was vanjaar die voorste driedrukker in die kompetisie. Progress beskik oor opwindende agterlynspelers. Hul afrigtingskorps moet nog besluit wie die spoedvraat se skoene gaan vol staan. Ethan Williams, Lushiano James en Luzane Williams is sterk aanspraakmakers.
Jade Roelfse (losskakel), wat vanjaar die voorste puntemaker in die kompetisie was, se skopskoen behoort ‘n groot rol te speel in die kompetisie. Sy skakelmaat, die voormalige Arend Mzoxolo Dyantyi (skrumskakel en kaptein), se leierskap behoort vir sy span goud werd te wees.
Voorlangs behoort hul lostrio, Wendell Pondo, Solomon Manxodidi, Chumani Kema, Wynand de Necker (vaskopstut) en Xavier Scholtz (haker) die vonk te verskaf.
Afskoptyd is 15:00.