Egpaar dood in huis aangetref
Die liggame van 'n George-Suid egpaar, Linda (54) en Jaco (55) le Roux is verlede Woensdagaand omstreeks 21:00 in hul woning in Wentzelstraat gevind.
'n Vuurwapen is op die toneel gevind en albei het skietwonde aan hul kop gehad.
Die Le Roux's se seun het onraad vermoed na hy vir twee dae gesukkel het om met sy ouers kontak te maak.
Hy het die sekerheidsmaatskappy gevra om ondersoek in te stel en die wag aan diens het op die toneel afgekom.
Dit is onbekend wanneer die skietvoorval plaasgevind het.
Kapt. Malcolm Pojie, die Suid-Kaapse polisiewoordvoerder, het bevestig dat 'n moorddossier geopen is en dat ’n geregtelike doodsondersoek gedoen word.
'n Gedenkdiens vir die egpaar vind Saterdag 4 November om 11:00 by die NG Blanco-gemeente plaas.