Saak oor en verby
Die parkeerpleksaak waarby 'n George-raadslid, Johan Stander, en 'n voormalige DA-raadslid, Gert Niehaus betrek is, het verlede Donderdag, 10 Mei, uiteindelik tot 'n einde gekom.
Landdros Götz Essel het bevind daar is nie voldoende getuienis wat die verdere voortsetting van die verhoor sou regverdig nie. Al drie aanklagte teen Stander is afgelas.
Die saak het gevolg na 'n insident in Oktober 2016, waartydens die twee mans slaags geraak het oor 'n parkeerplek buite die George-munisipale gebou.
Beide Niehaus en Stander is intussen van die burgemeesters komitee verwyder en Niehaus het uit die DA bedank.
Die drie aanklagte wat teen Stander gelê is, sluit in crimen injuria (naamskending), aanranding en aanranding met die opset om te beseer.
Niehaus het vroeër getuig dat sy nekoperasie 'n direkte gevolg was van die onderonsie. Stander het hom met lêers teen die bors gestamp na 'n woordewisseling in die parkeerplek. Niehaus het R200 000 skadevergoeding geëis.
Landdros Götz Essel het gesê die eerste twee aanklagte is eintlik 'n verdubbeling van een aanklag. Hy het verwys na die getuienis van George-raadslid Gerrit Pretorius, wat tydens die voorval die amp as onderburgemeester beklee het. Pretorius het vroeër getuig dat Niehaus aan hom erken het dat hy op Stander gevloek het. Stander se regsverteenwoordiger, Eckert Brand, het verduidelik dat die aanklag om daardie rede nie water dra nie. "Jy kan nie iemand van laster aankla as jy self die persoon belaster het nie," het hy gesê.
"Wat die derde aanklag betref het hy bevind dat alhoewel dit op die oog af aanranding mag wees, is die tipiese geval, soos ons van dag een af gesê het, nie iets waarmee die hof homself besig behoort te hou nie. Dit is 'n aangeleentheid waar twee grootmense hulle soos kinders gedra het en die howe hou hulself nie met daardie goed besig nie en daarom het hy hom onskuldig bevind."
"Die aansoek was een van ontslag. Aan die einde van die staat se saak kan die beskuldigde vra waar daar nie voldoende getuienis is nie, dat hy ontslaan word. Dit is presies wat hier gebeur het. Ons het so 'n aansoek gebring en die landdros het bevind daar is nie voldoende getuienis wat die verdere voortsetting van die verhoor sou regverdig nie. Hy is op al drie aanklagte ontslaan."
Lewe na die saak
Stander het na die hofsitting gesê dit was 'n moeilike 19 maande. Hy het medekollegas, sy familie en sakelui bedank vir hul vertroue in hom en volgehoue ondersteuning. "Al wat ek vir jou kan sê is dat van dag een af was hierdie hele aanklag gebaseer op leuens en bedrieglike optredes. Ek wil nou rustig huis toe gaan."
Wat sy regskoste betref het Stander gesê dit Johan Stander (links) en sy regsverteenwoordiger, Eckert Brand. gaan oor meer as net regskoste.
"Ek is op 'n stadium benadeel in my eie werksituasie, as gevolg van hierdie insident. Ek was nog altyd eerlik en opreg. Wat hierdie mense aan my probeer doen het en om my op hierdie manier te probeer verneder en af te breek was hartverskeurend. Ek kon dit nie van my eie kollegas aanvaar nie.
Maar ek moet sê daar was ander kollegas, opposisiepartye, sakelui, die algemene publiek wat deurentyd by my gestaan het."
Niehaus het by navraag gesê dit was nie sy saak nie. "Ek het die klagte by die polisie gaan lê en die staat het dit hanteer. Ek het respek vir die staat se uitkoms. Ek stem glad nie saam daarmee nie, dit is alles behalwe die waarheid. Op die einde van die dag sit ek met die bewyse en dit het nooit in die hof voorgekom nie."
Op 'n vraag of hy 'n siviele eis gaan instel, het Niehaus gesê hy gaan nou aan met sy lewe. "Ek is nou klaar met politiek en al hierdie Mickey Mouse bakleiery en nonsens. Ek wil 'n kind van die Here wees en my werk doen."