Eden-skaakproewe: 407 neem deel
Pauline Lourens
Die Eden-skaakproewe wat op Saterdag 12 Mei by Hoërskool Outeniqua gehou is, het seepglad verloop.
Daar was 407 leerders wat deelgeneem het onder meer vanaf Laerskool Outeniqua en Hoërskool Outeniqua, Laerskool GeorgeSuid, Laerskool Blanco, York High School, Hoërskool George, Laerskool Hoekwil,
New Dawn Park, Holy Cross Primary en Glenwood.
Opgewondenheid oor die groot belangstelling het by die skool geheers waar ouers en onderwysers goeie ondersteuning aan deelnemers gebied het. Hannelie Liebenberg die koördineerder verduidelik: "Ons het met die vorige twee Eden-proewe oor die 400 spelers gehad wat deelgeneem het. Die spelers word verteenwoordig uit Hessequa (Slangrivier, Heidelberg, Riversdal en Albertinia ingesluit); Mosselbaai/ George/Knysna; Kannaland/Ladismith/; Oudtshoorn asook Prins Albert.
Kampioenskappe
"Gedurende die eerste twee proewe is 'n groep spelers gekies in die onderskeie ouderdomsgroepe (12 dogters en 12 seuns) wat die komende naweek van 19 tot 20 Mei gaan deelneem aan die WesKaapse individuele skaakkampioenskappe in Kleinmond. Hier gaan spelers meeding teen spelers van Weskus/ Overberg/Metro/ Cape Winelands.
"Na al drie proewe gaan ons spelers wat gekies word, ook deelneem in spanverband aan die SuidAfrikaanse junior skaakkampioenskappe in Boksburg vanaf 16 tot 20 Desember.
Hier neem elke jaar ongeveer 2 000 spelers van oor die land deel. Eden het die afgelope paar jaar ook uitstekend gevaar by hierdie kampioenskappe en van ons spanne het ook medaljes verower en spelers het ook bordpryse gewen."
Die snoepie en pannekoekbakkery het bygedra tot die aangename atmosfeer wat geheers het tydens die proewe waartydens 'n mens 'n speld kon hoor val soos leerders hulle volle konsentrasie aan die spel gegee het. Daar was geen selfone te bespeur nie.