Nuwe Voortrekkerkommando in Blanco
'n Nuwe Voortrekkerkommando, BlancoNiqua, is onlangs in Blanco gestig.
Kinders word genooi om hulle vergadering elke tweede Dinsdagmiddag om 14:30 by Laerskool Blanco by te woon.
Verskeie ander skole in die omgewing se jeuglede het alreeds aangesluit en die eerste groot uitstappie was na die tolhuis in die Montagupas. Sowat 50 jeuglede en ouers het geluister hoe Deon Makwena van Kaapse Natuurbewaring vertel het van ons inheemse blom- en boomerfenis en hoe om dit te bewaar.
Een van die nuwe offisiere se manne het gewys hoe word ‘n vuur gepak en daar is saam gesels oor vuurveiligheid. Daarna is daar stokbrood gebak en wors gebraai.
Twee talentvolle ouers het met banjo en kitaar die jongklomp laat sing voor die geleentheid afgesluit is met malvalekkers wat oor kerse gebraai is.
Die Blanco-Niqua-kommando verwelkom alle voorskoolse en laerskooljeuglede wat wil aansluit.
Bel die kommando se sekretaris, Henriëtte van Niekerk by 082 822 6405 of die kommandoleier, Gerda Stols by 083 772 8252 vir meer inligting.