Oakdale gaan 90 jaar groot vier
Hoër Landbouskool Oakdale gaan sy 90ste verjaarsdag met groot fanfare vier. Die skool is op 5 Mei 1928 met slegs ses leerders gestig - drie uit die Transvaal en drie uit die Vrystaat. Dr. DF Malan, minister van onderwys, het in sy openingstoespraak op 12 Mei 1928 groot vertroue in die skool se toekoms uitgespreek. Deur die jare is hy reg bewys - Oakdale is vandag ‘n krag om mee rekening te hou.
Met verloop van tyd is verskillende huise en koshuise aangebou om die groeiende leerdertal te huisves, en die skool het in 1941 sy huidige vorm verkry. Vandag is die oorspronklike skool die Fanie du Toitsentrum.
Die vierings word beplan om oor vyf dae te strek, van 30 Mei tot 3 Junie. Die makietie skop op Woensdag 30 Mei af met die optrede van die bekende musiekgroep Spoegwolf, in die markiestent vir al die leerders van die skool. Die program sluit ook ‘n kaas-enwyn waar oudskoliere as gaskunstenaars ‘n skouspel sal aanbied, ‘n gedenklesing, ‘n gholfdag, die gewilde Akkerfeesdans en steakete, en ‘n dinee en dans vir oudskoliere in.
Een van die hoogtepunte is ‘n rugbydag waar die Oakdale bulletjies met Paul Roos gaan kragte meet. Heerlike plaasontbyt sal by die Coffee Shoppe beskikbaar wees en mense kan hul kosvoorraad aanvul by die slaghuis en groentemark. Die vierings sluit Sondag 3 Junie af met ‘n gesamentlike dankseggingsdiens van die Riversdal Moedergemeente en Riversdal-Wes in die moederkerk, gelei deur die bekende prediker Riekert Botha.
Oudskoliere, ondersteuners en ouers van heinde en ver sal na Riversdal reis om hierdie besondere mylpaal saam met geesgenote te gedenk.
Die skool sien uit daarna om feesgangers op die plaas te ontvang en ou bande te versterk.
Kontak Marlene Carstens by bemarking@oakdale.co.za of 083 321 0818, of Kobie Theron by oudskolier@ oakdale.co.za of 028 713 2549, uitbreiding 4 vir meer besonderhede.