Tannie Greta US-koor se langslewende lid
Tannie Greta Gericke, 'n vrou wat diep spore in George getrap het, se "roem" strek verder as net George!
In die jaar wat beide tannie Greta en die Universiteit Stellenbosch 100 jaar oud word, word sy nie deur haar alma mater vergeet nie. Sy is verlede week op die universiteit se sosiale media as langslewende ouduniversiteitskoorlid onthou.
Sy is ook die eerste student wat die graad B.Sc in liggaamsopvoeding in Suid-Afrika en dus ook aan die US verwerf het.
Tannie Greta, wat in Oktober vanjaar 100 word, het van 1938 - 1940 aan die universiteit studeer, nadat sy van 1936 -1937 in Engeland by Dartford College in Kent studeer het omdat die kursus nog nie in Suid-Afrika beskikbaar was nie. Sy was 'n inwoner van Harmonie-dameskoshuis.
Tannie Greta het in die universiteitskoor onder leiding van beide William Morris en prof. Gawie Cilliers gesing,
Die Maties se beriggie lees verder: "Tannie Greta, wat ook in 1940 kaptein van die US se eerste vrouehokkiespan was, koester goeie herinneringe van haar dae by US: 'Ons het destyds self ons sportuniforms ontwerp. Ek onthou hoe ons van Coetzenburg, waar ons die praktiese deel van ons opleiding gekry het, fiets gery het na die hoofkampus. Stellenbosch het natuurlik destyds heeltemal anders gelyk as vandag. Daar was byvoorbeeld geen geboue by Coetzenburg nie. Die enigste geboude struktuur was die pawiljoen.' "
Die George-gemeenskap is trots op tannie Greta wat in 2018 saam met die Universiteit Stellenbosch 100 jaar oud word.
Lees die berig op die Maties se Facebookblad wttps://www.facebook.com/ stellenboschuniversity/photos/.
Volgens die US se webblad het dit in 1918 met slegs 40 doserende personeellede begin. Oor die afgelope 100 jaar het die universiteit uitgebrei en is daar vandag meer as 3 000 dosente, navorsers en professionele en administratiewe steunpersoneel.